Russia buaina a la tawp lo

Rio Olympic ṭan nan ni nga chauh a awm tawh a, he infiamna khawmpui liana sulhnu nei ṭha ṭhin Russia athlete-te dinhmun a la chiang thei lo. International Olympic Committee (IOC) chuan Russia dinhmun ti chiang tur hian mi pathum a ruat bik a, anni pathum thutlukna chu vawiin hi chuan a hriat theih tawh tura beisei a ni.

Russia dinhmuna thu-tlukna tawp siam tur hian IOC chuan president of World Archery leh Head of the IOC medical and scientific commission ni bawk Ugur Erdener, IOC athletes commission Claudia Bokel leh Spanish IOC member Juan Antonio Samaranch Jr te a ruat a ni.

World Anti-Doping Agency (WADA) chuan Russia hi Olympic a inhnamhnawih thei lo hrim hrim tura hrem an phut a, mahse IOC lam chuan dan zawm famkimte chuan Rio an pan ve theih nan kawng an siamsak thung. Tun dinhmunah Russian infiammi 250 zet chu inelna hmachhawn thei dinhmunah an ding tawh - IOC dan leh hrai zam zawm famkim thei ten Brazil an pan thei dawn chiang em tih chu a hriatthuai dawn.

IOC thupuangtu Mark Adams chuan, "En^-dik-tu rual hian rawtna hnu-hnung ber hi pawm tur a nih leh nih loh an ti chiang ang. Thil engkim langtlang taka tih kan duh," tiin a sawi.

International Asso-cia-tion of Athletics Fede-rations (IAAF) chuan Rus-sian athlete 67 (Track and field) te chu damdawi hman phal loh hman leh dan bawhchhiat chungchangah thiam loh a chantir tawh a, IOC in dan leh hrai a zam thar aṭangin infiammi 30 chuang zet hnawl an ni leh tawh bawk. Mahse, Russian athlete zingah dan zawm famkim leh tihsual nei lo ṭhahnem tak an awm tih finfiah a ni tawh a, an tan kawng a inhawng leh mai thei.