Mohun Bagan player of the season Mizo tlangval Jeje Lalpekhlua

Mohun Bagan chuan Inrinni khan season hman zawh taka an club huam chhunga infiamna hrang hranga che ṭhate chawimawina hun an hmang a, Mizo tlangval Jeje Lalpekhlua chu Best Footballer of 2015-16 season (Late Karuna Sankar Bhattacharya award) chawimawina Sony Norde nen hlan an ni.

Hnahthial tlangval hian season hman zawh tak kha duhthusama ṭhain a hmang a, Indian Super League-ah Chennaiyin FC chu champion puiin SAFF Cup-ah India a champion pui bawk a, I League-ah Kolkata club tan an nomawi humhim thei lo mah se Federation Cup-ah nomawi a chawipui thung.

Federation Cup season khata goal riat khunga record siamtu Jeje Lalpekhlua chuan, "Mahni club chhung ngei aṭanga chawimawina dawn hi chu a hlu bik a, khelhpui ṭha tak tak kara Sony Norde nen thlan kan ni hi a nawm dan a dangdai hle a ni. Vawiina chawimawi ka nihna hian tun aia ṭha lehzual zawka khel turin nasa takin min fuih a ni," tiin hmalam pan zel a tum thu Vanglaini palai a hrilh.

India tan vawi 36 inlana goal 15 khung tawhtu striker hi Mohun Bagan player of the season-a thlan a nih hma hian ISL Emerging Player of the league leh FPAI Indian player of the year chawimawina a lo dawng tawh a, mimal chawimawina dawn chu thil hlu bik a nih thu a sawi.

Season hman zawh taka club leh ram tan inelna hrang hranga match 44 inkhelh bul a ṭan aṭanga goal 32 khungtu striker chuan, "Mimal anga chawimawina dawn hi thil harsa a ni a, khelh ṭhat bakah inhliam loh a ngai a, vanneihna ken tel a ngai. Mahse, ka beisei ngam loh thil tam tak tawngin mimal chawimawina ka dawng nual a, heng hi Pathian malsawmna liau liau a ni. Season tharah pawh ṭha taka khel thei turin ka inpuahchah ang a, hei aia sang zawk hi ka thlen theih ka beisei a ni," tiin Mizo tlangval hian kawng laklawhah chawlh mai a tum lo.