United aia lawm zawk Arsenal

Arsenal-in season tharah Champions League an khel dawn chiang tawh a, playoff pumpelh turin Manchester United laka point hlawhchhuah an mamawh a, an hlawhtling.

Pathianni zan khan Old Trafford-ah Manchester United-in Arsenal an mikhual a, Ander Herrera hmanga United hmahruaina chu substitute Tyler Blackett own goal hmangin Arsenal-in an sut a, United tana vawi khat inlanna keeper Victor Valdes-a'n tih theih a nei lo.

Arsenal-in Champions League group stage khel nghal turin Sunderland leh West Brom lakah point hnih chauh an hmuh a ngai tawh a, Black Cats hi Nilaini zanah an hmachhawn ang. Manchester United-in an match hnuhnung berah tla thei dinhmuna ding Hull City an khelh pui bawk ang.

Arsenal-in kum thar nia Southampton laka first half-a goal an chhuah hnuah a vawi khat nan an chhuah a, vei lam aṭanga Ashley Young cross chu vengtu nei lo Herrera-a'n dang buai loin minute 30-naah a khung nalh hle.

United chungnung hretna kawngah Young a che ṭha a, passing mawi khel ṭhin Arsenal-in tihsual an ngah hle.

Darkar khat hnuah che fuh thei lo Radamel Falcao aiah Robin van Persie a lut a, Colombia forward tan Old Trafford-a United kawr haa a match hnuhnung ber a ni thei hial ang.

Second half-ah Arsenal game a ṭha hret a, United keeper khel ṭha David de Gea leh defender Marcos Rojo te lakchhuah an nih hnuah Arsenal goal hmaah an hlauhawm sawt.

Minute 82-naah substitute Theo Walcott cross chu Blackett chu a dang perin Barcelona keeper hlui Valdes-a'n a en goal a, 1-1 in inkhel a tawp.

Engnge an sawi?

Manchester United player hlui Phil Neville chuan, "Van Gaal hian season khat­naah palinaa awm a tum a, a hlawhtling. Season tharah chuan Champions League an khel tawh dawn a, Premier League champion an tum tawh ang," tiin Louis van Gaal-a'n season ṭha tak a hman thu a sawi.

Arsenal manager Arsene Wenger chuan, "First half-ah bul kan ṭan muang a, second half-ah chuan kan chungnung zawk. Ka player-te an khel ṭha a, a uiawm lai chu point thum kan hlawhchhuak thei lo kha a ni," tiin inkhel chawhnu lam an thunun thu a sawi.

Pathumna chungchang zawhna chhangin Wenger chuan, "Chhan thiam har khawp mai, October thla khan min zawt se chuan ka lungawi tihin ka chhang ang. Amah­erawhchu pakhatna nih hi kan duh vek a ni a, chutihrualin team 17-in tuna an awmna aiin kan awmna hi an duh zawk dawn a, a lawmawm thoin ka hria. Season tharah chuan tun aia dinhmun sang zawka awm kan tum ang," a ti.