MotoGP France-ah Yamaha an ropui

Pathianni khan MotoGP Grand Prix of France 2015 chu tlan zawh a ni leh ta a, tun season a che ṭha mek Yamaha bawk an chungnung leh hle. Yamaha rider Jorge Lorenzo chu a team-mate Valentino Rossi umphak lohin pakhatna a ni. World Championship-ah pawh an inthlauhna a tlem zel a, point 15 chauhin an inthlau ta.

France-ah hian World champion Marc Marquez chuan pole position aṭanga bul ṭanin beiseina nei sang viau mah se a hun ṭha neih a hmang ṭangkai zo lo. Pathumna aṭanga bul ṭan Lorenzo umphak loin Marquez hi palinaah a thleng pha chauh a ni. Le Mans tlankawngah hian kum 2012 khan Lorenzo hi pakhatna a lo ni tawh bawk.

Repsol Honda Spanish rider Dani Pedrosa-a'n beisei a phak lo a, lap hnihna an tlan chauh tihhin a chesual a, a intlansiak chhunzawm thei lo. A ban an zai hnua a vawi khat intlansiak lehnaah beisei angin a intlansiak thei lo a ni. Britain Bradley Smith chu beisei aiin a tlan ṭha a, paruknaah a thleng ve. Mahse a team-mate Cal Crutchlow erawh lap riatnaah a chesual thung.

Yamaha rider Lorenzo chuan, "Ka beisei aiin intlansiak bul ka ṭan ṭha a, lap khatnaah khan Andrea Dovisiozo lehpelh na hun ṭha ka neih nghal avangin ka tan a awlsam phah hle. Ka hmaah Valentino Rossi ka hmu khan ka theih tawp tak meuhin beih angai dawn tih ka hre nghal mai a, ka tum leh duh ang ngeiin a tawpah chuan hlawhtlinna ka chang thei a ka lawm hle," tiin a sawi.

May 31 khian Italy a Mugello circuit-ah MotoGP intlansiak hi a awm leh ang.