Real Madrid pan mai tur De Gea?

Manchester United leh Arsenal inkhel thlir tan chuan David de Gea tel loa United awm dan tur chu a hmu lawk theih a, hun tawp rual chiaha Stretford End aṭanga 'De Gea' hming ring taka an auh rual ṭhup ṭhup danah Spanish keeper hi United ṭantuten chhuak lo turin an duh tih a chiang.

La Liga lamah...

Real Madrid-in Pathianni khan Espanyol 4-1 in an hneh a, Iker Casillas aiah Keylor Navas-a'n goal a veng a, Costa Rican goalkeeper ho lam takin a chhuah. Navas hian season thara No 1 ni turin manager Carlo Ancelotti a hmin a rinawm lo a, Casillas-a rinrawl bera a hman ngam a nih tawh loh bawk avangin Real-in De Gea hi lak luh ngei an tum ang.

Real an ropui

Transfer-ah kher hi chuan Real Madrid aia ropui an awm lo. Spanish club lian hian an mit it zawng chu an hlah lo a ni ber, an player lak luh zinga sawi hlawh ber chu an hmelma Barcelona aṭanga Luis Figo an la lut kha a ni.

Hemi hnua hian record fee-in Zinedine Zidane, Cristiano Ronaldo leh Gareth Bale an la lut a. Manchester United aṭanga hian Ronaldo bakah Gabriel Heinze, Ruud van Nistelrooy leh David Beckham te an la lut a, tun season-ah Javier Hernandez chu loan-in a khel mek bawk. Club pahnih inkarah boruak ṭha lo a awm lo a, player ṭha zawng zawng khelh châkna Real Madrid zawm hi United keeper David de Gea pawhin a duh khawp ang.

Van Gaal-a thukhawchang

Manchester United manager Louis van Gaal chuan, "De Gea hi Spanish a ni a, Spain tana khel a ni. Ram tan Casillas-a thlachhang dawltu la ni tho mah se Spanish club hian an duh. A bialnu Spanish a ni a, a nu leh pa ten kar khat emaw kar hnih emaw danah a inkhel a rawn en ziah a, a tan chuan a harsa a ni," tiin a keeper duh lai chuan Real Madrid pan a duh zawka a rinthu a sawi.

Dutch manager chuan sawi zelin, "Contract thar ziak leh turin United han fak vak dan ka hre tawh lo. Mipuiin an ṭawiawm ṭha em em a, inkhel bana an au thawm thei a awihawm lo zawk a ni. Tun season-ah a khel ṭha em em a, team tan a thawh hlawk takzet a ni," tiin chelh ngaihna vak a hriat loh thu a sawi.

Transfer chungchang sawiin Van Gaal chuan, "Tranfer-ah chuan player bakah club pahnih an inrawlh a, player duhthlanna a ni. Club ropui pahniha duhzawk thlan hi a harsa khawp ang. Kan bula cham zel a duh chuan kan lawm khawp ang, chutihrualin sawi tawh angin Spanish a ni a, a bialnu pawh Spanish a ni a, an ram club-a khelh chu a châkawm ang. Engpawhchunise awlsam tak chuan min chhuahsan bik lo ang," tiin chelh ngei an tum thu a sawi.

A lut tawh zawk em?

David de Gea hi report ṭhenkhatah chuan Real Madrid nen contract ziak tawh angin an tarlang tawh. Spanish chanchinbu Marca chuan Inrinni chhuak phek hmaah De Gea chu 'The Chosen One' tiin an chhal a, season thara Iker Casillas thlak turin an ziak.

Kum 24-a upa De Gea hian kum 2011 Atletico Madrid aṭangin pound maktaduai 18.3-in Manchester United hi a zawm a, a contract neih lai hi season tharah a tawp dawn. Club pahnih hi pawisaah an buai lo a, keeper ṭha neih tumin an inbei mek.

Bale-a hming a lang

Khawvel player manto ber Gareth Bale chu Real Madrid-ah a tla tlum lo a, supporter-te pawh auh phur a hnekin an au nawmnah hial. Welsh winger hi Manchester United nena sawi zawm a ni.

Manchester United captain hlui Gary Neville chuan, "Manchester City, Chelsea, Arsenal leh Liverpool ten Gareth Bale hi an duh vek a. Real hnen a player an pe dawn a nih chuan De Gea thleng nana Bale hman hi a sual lo ang. Spanish keeper Manchester United player of the season a ni chiang a, United hian hlawkna nei loin an chhuah tur a ni lo," tiin a sawi.

Falcao a chhuak dawn?

Radamel Falcao hi goal khung turin United-in an la lut a, Colombian forward hi English club-ah a hlawhchham. Falcao hian club tan vawi 29 a inlan a, vawi 17 starting eleven a chang a, goal li chauh a khung.

Kar khata £265,000 hlawh Falcao hi a chhuah mai a rinawm a, Arsenal nena an inkhelh ṭuma Robin van Persie-a'n a thlak khan media lam chuan United ṭantu a mangṭha tihin an chhuah.

Dutch manager Van Gaal chuan, "Falcao chung­chang chu kan hriat lawk ang vek kha a ni. Season tawpah kan tichiang ang. A chhuah dawn a mipui lam hawia kut a vai kha mipui a mangṭha na tura anga kan ngai a nih chuan suangtuahna mai a ni tih hriat a ṭha e," tiin Falcao hmalam hun a la chian loh thu a sawi.