Liberty Stadium-ah Man City an vul
Pathianni zan khan Swansea City khelmualah Manchester City an lenglut a, an mikhualna ramah 4-2 in Manchester City an chak. Premier League khelh tur match khat chiah nei tawh chungin pathumna aia hniamah Manchester City an awm thei tawh lo a, Champions League group stage an lut chiang tawh. Swansea City tan erawh season thara Europa League an beiseina a thamral ta.
Liberty Stadium-a inkhelah hian Manchester City a zawm hnua a club hlui lama a zinchhuah hmasak berah Wilfried Bony chuan goal a khung a, Yaya Toure chuan Premier League-a a goal 50 na khungin goal hnih a khung bawk.
Inkhel chu
Khualmualah Manchester City an tlangnel a, inkhel ṭan aṭanga minute 21 na lekah Yaya Toure chuan an hmahruaina goal a khung a, minute 36 naah James Milner chuan a rawn khung zui ve leh nghal bawk. Swansea-in an khelmualah tlawm mai an tum bik lo tih tilangin minute 45 naah Gylfi Sigurdsson hmangin goal khat an rawn khung.
Chawlhlawk an hmang a, 2-1 in Manchester City-in hma an hruai. Second half-ah tlar hma nei ṭha Man City bawk an hlauhawm leh a, Mangala, David Silva leh substitute Jesus Navas te'n Swansea City tlar hnung an rum ṭhaih ve leh nghal. Mahse, goal khung hmasa zawk erawh Swansea an ni. Bafetimbi Gomis chuan minute 64 naah an si phurh sutna goal rawn khungin a match hnuhnung pangaah goal nga a khungna a ni ta. Players nei ṭha City-in chak ngei an tum. Yaya Toure chuan minute 74 naah a goal hnihna rawn khung ve lehin substitue bench aṭanga rawn tlan lut Bony chuan minute 90 naah a club hlui lamah goal rawn khungin 4-2 in Manchester City chak zawkah an ṭang ta a ni.
Eng nge an sawi?
Swansea manager Garry Monk chuan, "Ka ngaihdanah chuan kan khel ṭha tak zet a, Europe a inlan tur khawpin he team hi a ṭha tawk a ni. Europe a inlan turin theihtawp kan chhuah a, kan hlawhtling zo ta lo. Mahse, nipui transfer hunah players ṭha zawk kan inlakluh belh zel anga, tun season-a ka thlen chin aia sang hi season tharah thlen kan tum ang. kan beisei ang result hlawhchhuak zo lo mah ila team ṭha tak kan nih zia kan pho lang a, season tharah chuan tun ai hian kan ṭha lehzual dawn a ni," tiin season thar a thlir lawk.
Manchester City manager Manuel Pellegrini chuan, "Kan inkhelh hmabak te khel zo phawt ila, tun season kan hman dan chu kan thlir let chauh ang. A pawimawh ber chu game tinah 100% kan pek hi a ni a, Premier League-ah chuan eng team pawh hi tawh an khirh em em vek a ni. He team hi chuan Premier League title chawi tura inkhelh hi a duh ber a ni," tiin an champion zo ta lo chu a ui thu a sawi.
Tun season-ah game ṭhenkhata Joe Hart aia Willy Caballero a luh tir chhan sawiin Pellegrini chuan, "Joe hi England rama keeper ṭha ber pawl a ni a, tun season-ah a hmasawnna nasa taka hmuh tur a awm bawk. Caballero kan luh tir ṭhin hian a ti ṭang sawt a, a ṭhat phah a ni," a ti.