National girls sub junior football-ah semifinal lut Mizoram 19-0 Chandigarh

National Sub Junior Championship for Girls-ah Mizoramin result ṭha an nei zel a, Quarter-final group stage match hmasa berah Odisha 3-0 a an hneh hnuin nimin khan Chandigarh chu19-0 in an sawp a, semifinal an lut chiang ta. Mizoram tan Vanlalhriati'n goal riat tehmeuh a khung a, Ruthi Lalrinmawii leh Elizabeth Vanlalmawii te'n goal thum ve ve an khung bakah Grace Larampari, Gladys Zonunsangi leh Ruthi Vanlalpeki te'n goal khat ṭheuh an khung bawk.

Mizoram hian Nilaini zing dar 7:00 khian Bihar nen group hmahruaitu nih an inchuh ang. Goal difference nei ṭha Mizoramin group hma­hruaitu ni turin draw chiah an mamawh tawh. Group khat aṭangin pahnihin semifinal an lut dawn a, group pakhat zawkah Manipur, Maharashtra, Haryana leh Jharkhand te an awm thung.

Mizoram manager Lalnunsanga chuan, "Kan nau te an khel ṭha takzet a, chutih rualin Chandigarh hi an nem ve hrim hrim bawk. Group match hnuhnung bera kan tum tur Bihar hi chu Chandigarh ai chuan tawh an khirh deuh turah ka ngai," a ti.