Italian Open champion Sharapova

Russian seeded pathumna Maria Sharapova chuan Spainish world number 10 Carla Suarez Navarro hnehin Italian Open champion nomawi a chawi.

Pathianni zan Italian Open hmeichhe final-ah hian Sharapova leh Navarro hi an inbei tawk hle a, darkar hnih leh a chanve chuang an inkhel. A tawpah tharum leh tawnhriat ngah Sharapova 4-6, 7-5, 6-1 in a chak ta a ni.

Final-ah hian Navarro hian inkhel bul a ṭan ṭhain set khatna harsa vak loin 4-6 in a la a, set hnihnaah pawh 5-5 a ni hman. Navarro hi chak tura a lan hman tawh laiin Russian Sharapova rawn ṭang let ve lehin point riat a rawn hmu zawn a, 7-5 in a chhuhsak leh. Final set-ah erawh Sharapova hian harsatna tawk lo in 6-1 in hnehna a chang.

A champion avang hian May 24 a khelh ṭan tur French Open-ah Sharapova hi seeded pahnihna a ni ang. Tun dinhmunah Sharapova hian champion nomawi 35 a chawina chiah a ni.

Sharapova chuan, "Ka vawikhat champion na ni lo mah se champion nomawi ka chawi chiah hi chuan a vawi­khatna ang tho khan ka lawm leh ṭhin. Player ṭha tak tak leh thiam tak tak an lo chhuah zel avangin hmeichhe tennis inelna hi a hautak hle a, chuvangin champion theih hi a hlu bik a ni," tiin a sawi.