Milan ngam loh Berardi

Juventus aṭanga loan a Sassuolo-in an hawh forward Domenico Berardi chuan Pathianni zan khan an mikhual AC Milan lakah hattrick siamin a team te a chak pui a, Serie A inkhelah Filippo Inza-ghi naute'n 2-3 in Sassuolo an ngam lo.

Khualmuala zin chhuak Milan tan Alex leh Bonaventura te chuan goal khat ve ve thun mah se, goal khat khungtu Milan midfielder Bo­naventura leh Suso te chu hnawhchhuah an nih avangin Milan-in goal dang an thun belh thei lo.

A player pahnih an hnawhchhuah avanga lungawi lo Milan mana­ger Filippo Inzaghi chuan, "Player 11 ve ve a khel tluan chu ni ila kan result hi a danglam ngei ang. Bonaventura leh Suso te khan Yellow card pakhat bak hmu tur an ni lo, a vawihnihna an hmu kha chu a awm ang lo hlein ka hria. Goal kan chhuah hma avangin inkhelh a harsa a, mahse rang takin kan insiam ṭha leh thei. Match refree thutlukna vangin kan chak loah ka ngai," tiin a sawi.

A hma hun an zawhna chhangin Inzaghi chuan, "He lai hmuna awm hi ka tan chuan a nuamin chawimawina a ni a, hnathawh tur tam tak ka la neih avangin cham chhunzawm zel hi ka duh," tiin a sawi bawk.

Tun season-ah Milan hian beisei an phak lo chhunzawm zel a, league match 36 khelh tawh aṭangin point 46 chauh an la hmu. Table-ah 11 naah awm mekin hma­hruaitu Juventus nen an inthlauhna chu point 33 zet a tling a ni.