IPL a hmawr an bawk hnai
India Premier League-in tawp lam a hnaih tawh a, Pathianni khan group stage-match khelh tur la awm te chu khelh zawh a ni ta. Inkhel hmasa zawk tura ruahmanah ruah sur in M.Chinnaswamy Stadium, Bangalore-a ti buai a, Delhi Daredevils leh Royal Challengers Bangalore te'n an match khelh tur an khel thei lo. Team pahnih hi point khat ve ve pek an ni a, Virat Kohli captain na hnuaia khel Bangalore hi IPL table-ah pahnihna niin 'qualifier' khel turin an inhlangkai.
Mumbai an vul
Pathianni zana inkhel pakhat zawkah Mumbai Indians-in wicket kua a Sunrisers Hyderabad sawpin IPL table-ah pahnihna dinhmun an hauh a, qualifier khel turin an inhlangkai.
Rajiv Gandhi International Stadium, Hyderabad-a inkhelah mual neitu Hyderabad batsman te'n mikhual bowler te an ti hleithei lo a, over 20-ah run 113 vawchhuakin mi sawm an hloh.
Mumbai Indians-in an target umpha turin hun an duh rei lo. Over 13.5-ah run 114 vawchhuakin mi pakhat chiah an hloh a, an chak chiang hle. Mumbai Indians tan Parthiv Patel a che ropui a, kum 30-a upa India tan pawha lo inlan tawh wicket-keeper batsman hian ball 37 a hmachhawnah run 51 vawchhuakin a team a chakpui chiang hle.
Eng nge qualifier chu?
India Premier League-a an kalphung hi a danglam hle. Table-a a sang pali chu qualifier khel tur hian an tling a, an ni pali zinga pahnih hian final an khel leh ang.
Table-a pakhatna leh pahnihna te'n Qualifier 1 an khel anga, a chak zawk zawkin final an lut ang. Table-a pathumna leh palina te'n Eliminator round an tih chu an khel ve leh anga, a chak zawk zawk in Qualifier 1 a chak lo zawk team kha Qualifier 2-ah an hmachhawn ve leh ang. Qualifier 2-a chak zawk hian final-ah qualifier 1-a team chak zawk an hmachhawn leh dawn a ni.
IPL-in dan an hman lai hi Mizorama cricket inelna sang ber Mapuia cricket League-ah pawh hman a ni.
Tu te nge khel dawn?
Zanin dar 8:00-ah hian Qualifier 1 match hi khelh nghal a ni dawn. Wankhede Stadium, Mumbai-a inkhel turah hian table chung bera awm Chennai Super Kings chuan pahnihna dinhmun hauhtu Mumbai Indians an hmachhawn dawn a, a chak zawk zawk in final an luh nghal dawn avangin inkhel hmuhnawm tak ni ngei tura beisei a ni.
Chennai Super Kings tan match 14 -a wicket 20 la tawhtu Dwayne Bravo leh match 13-a wicket 18 la tawhtu Indian bowler Ashish Nehra te hi bowling lama an innghahna an ni leh dawn a, batting lamah New Zealand batsman Brendon McCullum leh India captain MS Dhoni an neih bawk avangin an phang lo ang.
Mumbai Indians hi an captain Rohit Sharma ho in an rawn khel leh dawn. Indian batsman zinga Twenty20 cricket run 5000 siam tling thei hmasa ber dawttu hi a naute tan chuan thlamuanpui tham a ni. Bowling lamah match 13 a inlana wicket 19 la thei Sri Lankan bowler Lasith Malinga an kawl bawk avangin Mumbai Indians-in qualifier 1 an khel tur hi a mak lo.
Nilaini zan dar 8:00-ah qualifier 1-a chak lo zawk tum turin pathumna Royal Challengers Bangalore leh Rajasthan Royals te eliminator round-ah an inkhel ve leh ang.
TEAMS M W L PTS
1 Chennai Super Kings 14 9 5 18
2 Mumbai Indians 14 8 6 16
3 Royal Challengers Bangalore 14 7 5 16
4 Rajasthan Royals 14 7 5 16
5 Kolkata Knight Riders 14 7 6 15
6 Sunrisers Hyderabad 14 7 7 14
7 Delhi Daredevils 14 5 8 11
8 Kings XI Punjab 14 3 11 6