La Liga-ah Barcelona an champion

Cristiano Ronaldo hat­trick-in Barcelona champion kalkawng a dal thei tawh lo. Luis Enrique hoten Pathianni zan khan Vicente Calderon-ah Lionel Messi goal hmangin Atletico Madrid an hneh a, La Liga-ah a ṭum 23 nan Barcelona an champion.

Phuba an la

2012-13 season-ah Barcelona an champion a, Nou Camp-ah kum zawna champion theihna chance an nei. Season khar nan hmahruaitu Atletico an mikhual a, champion turin chak an mamawh.

Amaherawhchu Barce­lona-in hemi season-a Champions League aṭanga hnawtchhuaktu Atletico an draw a, Diego Simeone ho­te'n an mualah ngei cham­pion nomawi an chhuhsak.

Tun season-ah champion tumin Real Madrid leh Barcelona an inum a, Atletico-in an khelmual Vicente Calderon-ah Catalan Club champion hun tih khawtlaina hun ṭha an nei. Enrique hoten an nghak thei tawh lo, minute 65-naa Messi goal mawi tak hmangin Barca an chak.

Barcelona-in nomawi chhuhsaktute khelmual ngeia champion an nemnghet thei hi an lawm khawp ang.

Champion kalkawng

2013-14 season-ah Barcelona-in nomawi an chawi lo a, kuminah treble champion thei dinhmunah an ding. La Liga-ah an champion tawh a, Copa del Rey final-ah Athletic Bilbao an hmachhawn dawn a, Champions League final-ah anmahni ang bawka treble champion ni thei Italian champion Juventus nen an intum ang.

Messi Magic : Season liamta khan Messi-a'n game 46-ah goal 41 a khung a, assist 14 a nei. Record ṭha tak ni mah se Ronaldo lakah Ballon d'Or chawimawina a chan. Tun season-ah game 54-ah goal 54 a khung a, assist 27 a nei bawk. 2016 Ballon d'Or dawng tur a chiang der tawh.

Suarez hnathawh : Kum hmasa lamah pawh Messi leh Neymar chu an khel dun tawh a, Luis Suarez hi Barca attack ti famkimtu a ni. July 2014 khan pound maktaduai 75-in Liverpool aṭangin Barca-in Suarez an la lut a, an tifuh hle.

La Liga bikah Uruguayan forward hian goal 14 a khung a, Messi (41) leh Neymar (22) te nen an pathumin league-ah goal 79 an khung. Inelna hrang hrangah South American trio hian goal 115 an khung.

Kum thara khelh dan thar : Luis Enrique hnuaia an bul ṭan dan a fuh bik lo a, point thum hmuh theihna tura ngaih Malaga, Celta Vigo, Getafe leh Real Sociedad lakah point an hloh a, champion turin Real Madrid an rinawm zawk.

2015-ah Barca thar an inlan a, Enrique-a'n mdifield-a ball inpek kual vak vak aiin an chakna ber tlar hma pathum a dah pawimawh a, hei hi result ṭha thlentu a ni.

Set Piece harhtharna : Season liamta khan Tata Martino hnuaiah set piece-ah an ṭha lo tih a chiang a, manager berin an len tawk loh chu chhuanlamah a hmang. Set piece aṭangin goal an khung thei lo a, an khingpui ten an khung fo thung.

Tun season-ah erawh Bayern Munich-in UCL semifinal second leg-a corner aṭanga goal hmasa ber an khung kha October thla hnua set piece aṭanga goal an chhuahna hmasa ber a ni. Chutihlaiin Gerard Pique-a'n goal sarih a khung a, Catalan club defender zingah kum 20 chhunga season khata goal khung hnem ber a ni. Player palian lo Messi pawhin Eibar an hneh ṭumin corner aṭangin a tauh lut.

Inhliamna lama vanneihna : Real Madrid-in an player pawimawh Luka Modric, James Rodriguez, Gareth Bale, Karim Benzema, Sergio Ramos leh Pepe te inhliam vangin an chhawr thei lo a. Luis Enrique erawh a vannei a, season tluanin player inhliam vanga harsatna a nei meuh lo.

Hruaitu ṭha Enrique : Pep Guardiola chhuah hnuah Barcelona an mangang a, an che fuh thei lo. Neymar transfer thubuai vangin an buai a, player naupang lak dan dik loh vangin FIFA in an hrem bawk. Enrique enkawl hnuah Barcelona an ṭha mai lo a, Janaury thla vel khan player ṭha ber Messi nen an inkarah khi lian tak a awm. Tunah erawh Barcelona an champion tawh a, boruak chhia a reh tawh, result ṭha thlentu Enrique hming sawi hmaih a thiang lo.