Djokovic a ropui zel
World number one Novak Djokovic chuan mipa tennis a thunun chhunzawm zel a, Pathianni zan khan Italian Open final-ah Roger Federer hnehin champion nomawi a chawi.
Djokovic hi Roger Federer leh Rafael Nadal te vanglaia rawn chawrchhuak a nih avangin champion nomawi chawi tam tawk lo mah se a taimak leh thawhrim rah sengin tunah chuan hneh theih loh ang hial a ni ta.
Italian Open final-ah Djokovic hian minute 75 chhung lekin Federer hi 6-4, 6-3 in a hneh a ni. Serbian star Novak hian inrintawk na a nei sang hle a, set khatna hun pawimawhah Federer sevice a chhuhsak theih avangin set khatna chu harsa lo takin a la. Set hnihnaah pawh Federer-a service chhuhsak leh nghalin a tawp thlengin a service a hum tluan. Kum 33 a upa Federer hi a tho chhuak zo tawh lo a ni.
Kuminah Djokovic hi a chhe ṭha takzet a, match 22 a chak zawn tawh a ni. Kuminah ATP World Tour Masters 1000 tournaments vawi nga awm tawh zingah vawili a champion thei. Federer leh Djokovic hi vawi 39 an inhmachhawn tawh aṭangin Djokovic hi a vawi 19 chakna chiah a ni.
May 22 a kum 28 tling mai tur Djokovic chuan, "Ka inkhelh ve tawh chinah chuan tun season hi bul ka ṭan ṭhat leh ka khelh ṭhat ber ṭum a la ni ang. Roger nena kan inkhel thei ṭhin hi ka tan chuan a hlu em em a, ka lawm ṭhin. Ka chet ṭhat lai a nih avangin keimah pawh ka hlimin nuamti takin ka inkhel thei. Roland Garros-ah hian eng nge lo thleng dawn chu ka sawi lawk thei lo a, mahse ka inring tawk hle a ni," tiin tun thla tawpa khleh tur French Open chungchang a sawi lang tel.