CYMA FOOTBALL A ṭha pali aṭangin pahnih an tlang dawn

Vawiin hian Lammualah inkhel thiam veng pali an inlan dawn a, CT Group Cup Inter Branch YMA Football Tournament final lut tur chinfel a ni dawn. Tlai dar 4:00-ah Armed Veng leh Dinthar an inkhel ang a, zan dar 7:30-ah Lengpui leh Bawngkawn an inhmachhawn bawk ang.

Armed Veng hmaah Dinthar

Inkhel hmasa tur Armed Veng ṭantuten kawr eng an rawn thawhchhuah pui dawn a, kawr eng langsar lo khawpa Dinthar mipui an chhuah bawk chuan Lammual chu a khat thaw khat ang.

Armed Veng hi tun hnaia YMA tournament hnu­hnung pahnihah an champion a, kuminah a zawna a vawi thumnan YMA-ah champion an tum leh meka; mahse an hma a ding tur hi Dinthar an nih avangin an kalkawng a awlsam dawn lo.

Armed Veng hian Mizoram Police winger Lalfakzuala an nei a, an chakna hnar a ni. Chakna goal thuntu a nih piah lamah goal siamsaktu a ni fo. Aizawl FC rawlthar Lalmuanzova leh Vanlalduatsanga an kawl a, tlan chak ve ve an ni a, MPL-a tawnhriat nei ṭha Lalbiakhlua an nei bawk. Defender lamah Lalnghinglova leh MPL 3 best player Lalramchullova an kawl bawk a, an chhe lo.

Dinthar lamin Aizawl FC midfielder Reuben Zosang­puia an chhawr thei tawh a, Reuben-a u Lalrinkima leh Chanmari West FC playmaker Lalawmsanga an awm a, Mizoram Police striker Lalnunmawia an nei bawk. Tlarhnungah tawnhriat ngah Police defender Ropuia bakah MPL1-a FC RS Annexe tlar hnung ti phuitu captain Lalnunsanga leh Lalsiamthara an la nei cheu.

Eng nge an sawi?

Armed Veng manager Lalramchhuana chuan, "Kan defender Lalruatsanga dinhmun a la chiang lo deuh tih mai loh chu kan dam kim avangin kan inring tawk hle. Kan chakna hnar ber pakhat chu veng mipuite an nih angin vawiinah pawh hian an ni hi kan innghahna an ni leh dawn," tiin a sawi.

Dinthar manager Lalthlengliana chuan, "Kan khing­pui tur Armed Veng hi team ṭha tak an ni a, mahse kan huphurh hran lo. Chak ngei kan tum a, goal khung ngei kan tum ang. Chak tur chuan fan-te puihna kan mamawh dawna vawiin tlaiah hian kan beisei ang fans an rawn thawhchhuah ngei ka ring," tiin Vanglaini palai a hrilh.

Lengpui Vs Bawngkawn

An inkhel hnuhnung pahnih kan thlir chuan Bawngkawn hian ṭantu an ngah leh ngei dawn a, kawr sen an ha ngei ang. An khingpui tur Lengpui hian ṭantu an nei tlem bikin a rinawm lo a, an khaw mipui bakah 'neutral fans' lam an hip ngei ang.

Aizawl khaw pawn team dam awm chhun leh kum 2006 champion Lengpui chakna pakhat chu an tlarhnung phui ṭha hi a ni. An match hnuhnung pahniah goal khat chiah an chhuaha a, goal riat lai an khung thung. Lengpui tlar hnunga veteran pahnih JS Lalruatthanga leh Lalthangliana-te an la awm a, anni pahnih inkawp leh Bawngkawn hmatawng MPL2 best forward MS Dawngliana leh 2013 I Day Football best player H. Lalmuankima te innuai tur hi a hmuhnawm hle ang.

Lengpuiin midfielder MPL1 best midfielder Rohmingthanga an kawl a, Lajong leh Aizawl FC-te I League-a kaipuitu hi 2006-a an champion ṭuma star player a ni tawh a, tawnhriat ngah leh inkhel tidanglam thei khawpa thiamna nei a ni. Player hming enin kumin CYMA football-ah Bawngkawnin chhuan tur an ngah ber ang - MK-a leh Dawngtea bakah MC-a, Zuala, Rozama, Tluanga, Ronald-te hi MPL-a player ṭha ṭhiau an ni a, veteran Remruata an kawl bawk a, kumin chu 'Bawngkawn kum' thlentir tumin an ṭang hle.

Eng nge an sawi?

Lengpui manager R.Thanngura chuan, "Kan player-te an damkim avangin Bawngkawn hi ka huphurh hran lo. Veng mipui ten min ṭawiawm ṭha ṭhin a, kan inkhelh hun tur hi zan ni mah sela kan tlem bik lo ang," tiin Vanglaini palai a hrilh.

Bawngkawn manager Lalrinawma chuan, "Kan midfield hi kan chak loh deuh avangin inthuam ṭhat kan ngai, kan khingpui tur Lengpui hi team ṭha an nih avangin fimkhur takin kan khel ang. Kum dangah beisei pha lo deuh ṭhin mah ila kumin chu kan kum a nih ve tawh ngei ang," tiin a sawi.

Ṭhutna leh chhuah dan

May 16 khan Central YMA Office-ah semi final khel tur YMA Branch palia hruaitute, team enkawltute leh Organising Committee member-te an ṭhukhawm a, semifinal khel tur ṭhutna leh chhuah dan hetiang hian an rel.

Aizawl chhim lam, Venghlui hnaih lamah Dinthar leh Lengpui fans an thu ang a, inkhelh banah he lama ṭhute hi an chhuak hmasa ang.

Armed Veng leh Bawngkawn fans chu Aizawl hmar lam, AR cinema hall hlui hnaih lamah an thu ang. He lama thute hi inkhelh banah a chhuak hnuhnung zawk tur an ni.

Inkhel en tura kalte hi gate luh dawnah duty lamin an dap vek dawn a, zu, ruihhlo leh mi tina thei chi thilte Lammualah lakluh phal a ni lo.