Messi-a'n Barcelona training a zawm

Lionel Messi-a'n Barcelona chhuahsan dilna lehkha hmangin khawvel nghawr nghing mah se Barcelona khawpui chhuahsan hreh vanga ṭap a nupui fanaute pawh tui takin an muhil leh ta. 

Messi hian nimin khan Barcelona training a zawm ṭan ve leh tawh a, Catalan club chhuahsan a duh thu a sawi hnua Barca club training a zawm leh hmasak ber a ni. 

Kum 33 mi forward hian chhuah a dil avangin August 30-a club-in Covid-19 test an neih pawh a chhim duh lo a, club training a zawm duh lo bawk. Tunah erawh engkim chinfel a ni ta a, Barca jersey nen Messi-a'n training a nei leh tawh. 

Messi hian, "Ka chhuah theihna awmchhun chu club nen court-a inkhin a ni a, he club hi ka hmangaih em avangin Barca nena thubuai neih ai chuan cham ka thlang zawk a ni," tiin a lo sawi tawh a, season tharah Barca jersey ha chungin Messi kan hmu ang. 

Messi hian August 25 zan khan Barcelona chhuahsan dilna lehkha chu Catalan club thuneitute hnenah a thlen a, club kalphunga lawm lo Argentine forward hian chhuah pawh a duh tak tak niin a lang. 

Khawvel footballer piang tawh zinga thiam ber anga mi tam takin an ngaih hian season tawp apianga a thlawna chhuah theihna dan a neih chu hman theih a beisei a, mahse Barca lamin June 10 khan he zalenna hi a tawp tawh thu an sawi. 

Messi erawhin Covid-19 vanga season tih khawtlai a nih avangin June 10-ah he phalna a neih hi a la tawp loah a ngai a, club nen an thu a inang lo - club lam hian Messi-a chhuak dawn a nih chuan a release clause-a inziak zat euro maktaduai 700-a chhuah a ngaih thu an sawi. 

Manchester City nena thui tak sawizawm hlawh hman Messi hian a dinna chu dikah ngai mah se court thlen a ngai dawn tih a hria a, amah siam liantu court lama khin ai chuan season khat dang la cham chhunzawm a thlang ta zawk a ni - a contract neihlai hi nakkum nipuiah a tawp ang. 

Messi chuan, "Hei hi ka nun pum hmanna hmun chu a ni a, he hmunah hian ka hringnun chu mawi takin ka din a ni," tiin a tana Barcelona pawimawhna a sawi a,  chhuah duh vang ngawtin a club hmangaih hi court-ah a khing thei lo. 

Argentine forward chuan, "Ka fate zingah Mateo chuan engmah a hrethiam lo. Thiago erawh a upa zawk a ni a, television lamah a lo en ve bawk avangin a hrethiam. Ṭap chungin Barca chhuahsan lo turin min ngen a, mahse ka tan chhuahsan ngei a ngaih thu ka hrilh a ni," a ti a, mahse court thlen a duh miau loh avangin Thiago lawmna thlen turin Barca-ah a cham ta. 

Messi a cham dawn tak avangin Dutch coach Ronald Koeman tan pawh hnathawh a phurawm sawt ang tih a chiang a, Netherlands boss hlui hian Messi hmangin team an din tur thu a lo sawi tawh. 

Barcelona captain Messi chuan, "Ka fate pawh Barca-a seilian an ni a, he hmun hi nuam an ti hle. Mahse, chhuah kha ka mamawh tlat a, ka nupui pawhin thinlung na tak chungin kawng tinrengah min thlawp a ni," a ti - Messi hi Barca-ah cham dawn mah se lungawi taka cham a ni lo a, Koeman tan Messi meuh hlim taka awm tir turin hna a hautak ang.

La Liga president Javier Tebas chuan, "Messi-a'n Barcelona a chhuahsan mai hlauhthawnna kha ka nei lo hrim hrim. Kan hnena cham turin Messi kan duh a, football chanchina player thiam ber a nih avangin La Liga-ah a career hi hmang zo se kan duh a ni. 

"Kan hnenah kum 20-a cham tawh a, league dang pan loa a cham chhunzawm zel tur hi kan lawm takzet," a ti a, Messi chhuak ta se Spanish top flight football hlutna a tlakhniam theih dan tur a hai lo. 

Messi hian season liam taah khan Barca tan inelna hrang hrangah match 44 khelin goal 31-a khungsak a, vawi 26 assist a la nei thei - chuai lam a pan ve tawh nia sawi ni mah se a hnathawh hi world class player tam takin an vanglaia an hun tawn ang a la ni pha tho. 

La Liga hi September 11-ah khelh ṭan a ni dawn a, Barcelona hian September 27-ah an match hmasa ber khelin Villarreal an mikhual dawn a, Messi vang ngawt pawhin he inkhel hian ngaihven a hlawh thar lehzual khawp ang.