BVT hmalam Zo United kutah
Bethlehem Vengthlang FC-in match hnih an khelh tawh aṭangin point an la hmu lo. Vawiin tlai dar 2:45 hian BVT-in Zo United an hmachhawn dawn a, point thum an hlawh chhuak zo lo a nih chuan nikum I Day Football finalist hi an tla dawn. An chak chuan semi final beiseina a nung ang.
Tehna atan Lajong
Zo United-in an match hmasa berah Ramhlun North goal awm loin an draw a, MPL kaithar hi Shillong Lajong-in 4-1 zetin an sawp.
BVT hian Lajong hi an hmachhawn tawh a, I League club lakah hian goal khung theihna tur khawpa chance ṭha vawi nga vel zet nei mah se an hlah vek. Hun tawpah Lajong keeper tihsual vangin BVT hian goal an khung ve hram a, amaherawhchu BVT-in point an hlawh chhuak zo lo.
I league club Lajong hi vawiin inkhel turte tehna atana hman chu ni se BVT hi team ṭha zawk anga ngaih theih an ni a; amaerawhchu point aṭanga teh chuan Zo United an ṭha zawk a, semifinal lut tur pawhin an dinhmun a duhawm zawk.
Goal chhuah lo
I Day Football-a goal chhuah lo awm chhun Zo United coach Vanlalrova chuan, "Match hnih kan khelh tawh aṭanga goal khat chiah kan khung avangin ka hlauthawng lo a, goal kan chhuah loh avangin ka player-te chungah ka lawm hle. Tlarhnung kan rem phui phawt ang a, chumi zawhah chuan goal khung kan tum ang," tiin TATA Football Academy chhuak striker chuan a sawi.
Rova hian a sawi ang chiah hian a player-te pawh a rem a, captain Malsawma Chhangte chu tlarhnung khaipa niin a kawppui Lalnunpuia Pachuau lah Luangmual FC leh Chanmari West FC innghahna ni ṭhin a ni. Wing back-a a hman R. Lalthantluanga leh Vanlalruata te hi winger atan pawha player ṭha an ni a, goal venhim duh vangin tlarhnung lamah an awm.
Defence lai pui turin defen-sive midfield-ah Dominic Lalruatfela chu match hnih chhung a inlan tawh a, Kolasib tlangval pawh hi midfielder ni loin a
ṭhatna bera an sawi zawk chu defender a ni. Amaherawchu Domi hi Dinthar FC nena an inkhelh ṭumin a inhliam a, a thlak nan defence laia hming chher tawh Rosangzuala (Taia) leh Royal Wahingdoh midfielder hlui Laldinmawia te bukin an awm mek.
Goal khung tum
Bethlehem Vengthlang FC-in goal khung ngei ngei an mamawh a, coach Lal-biaksanga Colney chuan, "Beisei kan la nei a, chak ngei tumin kan khel dawn. MPL club hi chu an ṭha vek a, chak leh chak loh hi chu vanneih leh vanduai inkar a ni. Lajong nena kan inkhel video kha ka en let ṭhin a, kan vanduai ṭum a ni. Zo United hi kan vanneih
ṭum a nih phawt chuan kan hneh theih ngei ka ring," tiin Vanglaini palai a hrilh.
BVT-in Lajong an hma-chhawn ṭumin Lalding-ngheta a hmuhnawm fal a, captain hnathawh hi a ṭhiante'n goal-ah an chantir thei lo. Zo United hma-ah captain Dingngheta bawk a pawimawh dawn - PC Zosanga, Lalrammuanpuia (Apuia) leh Lalrinsanga ten an thlawp ṭhat a pawimawh ang.