Arsenal hel lai Mustafi man a to

Arsene Wenger-a'n an team ti chak thei tur an hmu a nih chuan tlarhma leh tlarhnungah player thar an lak tur thu a sawi a, tun dinhmuna an mamawh chu central defender niin Gunners mamawh chhanna chu Shkodran Mustafi hi a ni thei ang.

Arsenal hian an captain thar Per Mertesacker chu hliam vangin an chhawr thei lo mek a, German international hlui hian Premier Leaugue season bul a ṭan thei dawn lo tih a chiang tawh. Tlarhnunga rinrawl Laurent Koscielny chu Euro 2016 a khelh vangin chawlh pek a la ni a, Brazil defender Gabriel Paulista chu damkawr chauh a la ni bawk.

Gunners hian kum 21-a upa Calum Chambers leh hmanni lawka an lakluh rawlthar Rob Holding te chu central defender atan an hman a ṭul, England defender pahnihte hi theihna sang tak nei ni mah se an la patuai hle a, inkhel boruak sanga chhawr rim chi an la ni lo.

German international Mustafi lalut tur hian Gun-ners hian pound maktaduai 15 an phal chu Spanish club Valencia lamin an duhkhawp lo niin khawtlang media-te chuan an tarlang. North London club hian an player duh lalut tur hian pound maktaduai 20 an tawktarh leh dawn nia sawi a ni.

Kum 24-a upa Mustafi hian 2014 khan Sampdoria aṭangin Valencia a zawm a, match 61 khel tawhin goal ruk a khung sak ve tawh bawk. Germany tan match 12 khel tawhin Euro 2016-ah khan Ukraine lakah ram tana a goal hmasa ber a tauh lut.

French manager Wen-ger hian AS Roma defender Kostas Manolas leh Napoli tlarhnung dawltu Kalidou Koulibaly te a thlithlai nia sawi a awm bawk. Mahse, tun dinhmunah chuan Mustafi hi a ngaihven ber thung - German defender hi Emirates Stadium-ah a seng lut dawn a nih chuan pound maktadui 20 aia tlem lo a insen phal ngei a ngaiin a rinawm.