Everton an indinthar dawn: James an lalut!

World class coach Carlo Ancelotti an nei miau a, Everton-in nipui transfer bazar-ah thawm an neih nat chhunzawm zel - Real Madrid attacking midfielder James Rodriguez an lalut!

Everton hian James lalut tur hian pound maktaduai 20 an theh chhuak a, kum 29 mi James-a man tlawm zat hi season khat chauh Real-ah contract a neih tawh vang a ni pakhat a, a kumin tam lam a pan ve tawh vang a ni bawk. 

James hian Everton tan kum hnih chhung khel turin contract a ziak a, a contract hi a ṭul dan a zirin kum khat dang pawhsei theih tura ruahmanna siam a ni - Everton-in an hmelma Liverpool lakah ṭhenawm bengchheng satliah nih an tum tawh bik lo. 

Rodriguez chuan, "Sulhnu ropui tak nei club tana ka khel thei tur hi ka lawm, min hrechiang sa em em tu manager nena kan thawk dun leh thei tur pawh hian min ti hlim takzet a ni," tiin a boss hlui Ancelotti chu Everton a pan chhan zingah a lansarh thu a sawi. 

Colombian attacking midfielder chuan, "Carlo leh a technical staff-te chungah rinna ka nghat a, thil ropui tak kan tih theih ka beisei - he hmun ka pan chhan lian tak chu Carlo a ni a, chutihrual chuan hmasawn leh ṭhat belh zel tura he hmun hi lo pan ka ni ber a, he team hi hnehna chanpui a, inkhel hmuhnawm pho chhuak turin ka pan a ni," a ti. 

James hian 'King Carlo' tia hminglem an pek coach uapna hnuaiah hian Real Madrid leh Bayern Munich-ah a lo khel tawh a, Italian coach-in James-a lakluh vawi thumna a ni. 

James hian Zinedine Zidane hnuaiah hmun a chan loh avangin a hlutna hloh ve deuh tawh mah se player ṭha tak erawh a la ni reng a, Real-a a cham chhungin match 125-a inlanah goal 37 khungin assist vawi 42-a nei thei a ni. 

World Cup 2014-ah khan goal ruk khungin Golden Boot a dawng a, World Cup-a hming chher player lakluh loh duh loin Real Madrid chuan AS Monaco aṭangin an lei chhuak a, a hunlaia a man zat hi pound maktaduai 63-a tling niin an sawi. 

James hian a European football zinkawng chu Porto-ah ṭanin season thum a khel a, league nomawi vawi thum a chawi. Kum 20 mi lek a nih laiin Primeira Liga-ah Player of the Year-ah thlan a ni a, he dinhmun chelh thei naupang ber a ni. Porto aṭanga Monaco a pan khan a man zat chu pound maktaduai 38.5-a tling. 

Everton boss Ancelotti  chuan, "Kan hriat sang angin James hi player quality sang tak nei a ni a, striker-te tana goal khung tur siamsak lamah a thawh hlawk ṭhin hle. He club hmachhawp te a hriatin a phur em em a, hmasawn pawh a duh. 

"Everton-a zawm thei tur kha a hlim em em a, kan hnena lokal tura thlem ka mamawh lo - lungsi taka awm sain he club hi min zawm a ni," a ti a, Everton hian Napoli midfielder ṭha mi Allan an la tawh a, Watford midfielder Abdoulaye Doucoure lalut turin inremna an nei tawh bawk.

James hian Real tana a khelh chhungin nomawi chawi theih ang chu a chawi kim a, La Liga (2) leh Champions League (2) chu a langsar zual an ni - Monaco tih loh zawng a khelhnaah league nomawi a chawi vek tawh a, Everton tan hian eng ang takin nge hna a thawh theih hriat a châkawm ta hle.