Olympic Football an ṭan dawn ta
Rio Summer Olympic chu Zirtawpni hian a khuhhawnna neih tur ni mah se zanin dar 9:30 aṭang hian mipa football chu khelh ṭan a ni dawn. Match hmasa berah Iraq leh Denmark te an inhmachhawn ang a - champion tura rinkai Brazil, Mexico, Germany leh Argentina te an inlan zui bawk ang.
Olympic mipa football a hnu-hma nei ṭha chu vawi thum champion tawh Great Britain leh Hungary te an ni a, vawi hnih champion tawh Argentina leh gold medal kawl mektu Mexi-co pawh sawi hmaih theih an ni lo. 2012 London Olym-pic-a quarterfinalist Great Britain hi European Under-21 Championship-ah group stage paltang zo loa an tlak avangin kuminah an hmel kan hmu dawn lo.
Kumin Olympic-ah hian mipa team 16 an tel a, hmeichhe team 12 te chuan nizan aṭang khan inelna an nei ṭan tawh nghe nghe. Group paliah ṭhen hran an ni a, group tinah team pali zel awmin an inkhelh kual hnuah a sang pahnih ṭheuhin quarterfinal an lut dawn a ni.
Inlan turte
Olympic a inlan tur hian FIFA hnuaia inziak lut ram hrang hrang tan kawng a awm. Mahse, inelna tak taka tel tur erawh chuan qualifying an paltlang a ngai thung. Inelna lian dang ang lo takin kum 23 hnuai lam tana buatsaih a ni ṭhin, kuminah hian 1 January, 1993 hnulama piangte tan inlan theih a ni. Heng bakah hian team pakhatah kum 23 chunglam player pathum zel an tel phalsak an ni bawk.
Rio-a inlan turte hi a thlengtu Brazil, 2015 South American Youth Championship champion Argentina; 2015 UEFA European Under-21 Championship-a semifinal lut chin - Denmark, Germany, Portugal leh Sweden; 2015 Pacific Games-a palina Fiji; 2015 CONCACAF Olympic Qualifying Championship finalist Honduras leh Mexico; 2015 Africa U-23 Cup of Nations-a pakhatna aṭanga pathumna - Algeria, Nigeria leh South Africa; 2016 AFC U-23 Championship-ah pakhatna aṭanga pathumna - Iraq, Japan leh South Korea bakah 2016 CONCACAF-CON-MEBOL playoff-a US hnehtu Colombia te an ni.
Inlan tur langsar
World champion vawi nga ni tawh Brazil hian Olympic mipa football-ah gold medal an la dawng ngai lo, kuminah hian a thlengtu an nih avangin an ram record duhawm lo tak thaibo ngei an tum a, captain Neymar hoin an khel ang.
Barcelona star hian Olym--pic gold medal dawn a chak em vangin Copa America Cen-te-nario-ah pawh a inlan loh phah hial. Ani bakah hian Lazio midfielder Felipe Anderson, Paris Saint Germain defender Marquinhos leh Barca midfielder Rafinha an nei bawk. Tun nipui chhunga Arsenal, Chelsea leh Juventus te nen pawha sawi zawm ni tawh Santos striker Gabriel Gabigol Barbosa an la neih bawk avang leh a thlengtu an nih avangin Brazil hi ram dang tan hmachhawn an chak awm loh ang.
Nigeria tan tawnhriat nei tam John Obi Mikel a inlan dawn, Chelsea midfielder hi an ram tan thlamuan pui tham a tling a, mahse knockout round lut tur chuan a ṭhian ten an thlawp ṭhat a ṭul dawn a ni.
Premier League player zingah Tottenham winger Son Heung-min (South Korea), Arsenal stri-ker thar Takuma Asano (Japan) leh Gunners-a a khelhpui tur Serge Gnabry (Germany) te bak-ah Liverpool defender Tiago Ilori leh Manchester United goalkeeper Joel Pereira (Portugal) te hmel kan hmu dawn. West Ham playmaker Manuel Lanzini chu Argentina tana inlan tur ni mah se hliam vangin a inhnukdawk.
Zanin Inkhel Tur
Iraq 9:30 PM Denmark
Honduras 11:30 PM Algeria
Brazil 12:30 AM South Africa
Mexico 1:30 AM Germany
Portugal 2:30 AM Argentina
Group A : Brazil, South Africa, Iraq, Denmark
Group B : Sweden, Colombia, Nigeria, Japan
Group C : Fiji, South Korea, Mexico, Germany
Group D : Honduras, Algeria, Portugal, Argentina