Olympic aṭangin Wawrinka inhnukdawk
Rio Olympic-ah mipa tennis lama hming langsar Stan Wawrinka hmel kan hmu thei dawn lo. World number 4 Wawrinka hi Swit-zerland aiawha a inlan theih loh chhan chu a hnungzâng nat vang a ni - hetihlai hian Rafael Nadal erawh Brazil-ah a inlan dawn.
Kum 31-a upa Waw-rinka hian karhmasa a khelh zawh tak Rogers Cup-ah khan a hnung hi a ti na a, endik a nih hnuah tun dinhmunah a tan inkhelh zui chi a ni rih lo. Roger Federer a inlan dawn loh bawk avangin Swiss tan chuan channa nasa tak a ni ngei ang. Wawrinka a inhnuhdawh takah chuan ATP ranking-a a sang 10 zing aṭanga player panga zetin Rio an pan dawn lo tihna a ni.
French leh Australian Open champion ni tawh Wawrinka chuan, "Rio-a inkhelh ngei ka duhin ka chak em em a, ka zin ve thei lo tur hian min ti lungngai hle. Swiss infiammi Olympic hmang tura kal zawng zawngte duhsakna sang ber ka hlan a, ka awm hmun aṭangin an dinhmun ka lo ngaichang ve reng ang," a ti.
2008 Beijing Olympic-ah khan Wawrinka hi mipa double-ah Federer nen
ṭang dunin gold medal an lo la tawh a, 2012 London-ah erawh single first round-ah Andy Murray a hneh lo thung, a hneh loh Britain tlangval hi a champion zui nghe nghe.
Grand Slam vawi 17 champion tawh Roger Fe-derer chu a hliam enkawl duh vanga a lo inhnudawh tawh bakah hrileng mek Zika hlauh vangin Tomas Berdych, Milos Raonic leh Dominic Thiem te chuan Summer Olympic-a inlan lo turin thutlukna an lo siam tawh.
Nadal erawhin Zika a hlauh loh thu a lo sawi tawh, mahse Spain tlangval hi a banrek na vangin May thlaa khelh French Open aṭanga a inhnuhdawh hnuah a la inkhel leh lo. Rio-ah hian inlan dawn mah se tun hma lama a ṭhat dan ber ang kha chuan a khel chhuak phak kher lo ang.
Grand Slam vawi 14 champion tawh Nadal hian 2008 Beijing Olympic-ah khan an ram tan gold medal a lo vaw chhuak tawh a, kuminah hian single, double leh mixed double-ah te inlan tura tih a ni.
World number 5 Nadal chuan, "Thla hnih chhung ka inkhel lo tawh a, Rio-ah hian inlan mah ila ka ṭhat dan berin ka khel thei lo mai thei. Mahse, kan ram tan chuan ka theihna sang ber ka hlan ang," tiin a sawi. Summer Olympic tennis inelna bik hi Pathianni aṭanga neih
ṭan tur a ni ang.