Anti-doping system siamṭhat a ngai - IOC president
International Olympic Committee president Thomas Bach chuan infiammiten damdawi hman phal loh an hmang nge hmang lo tih leh, dan an bawhchhe ngei em tih endik turin Anti-doping system chu siamṭhat ngaia a hriat thu a sawi chhuak.
Rio Summer Olympic-ah hian World Anti-Doping Agency (WADA) report
aṭanga dan bawhchhia Russian infiammi 100 chuang zet chu an inlan thei dawn lo. He hian Russia chauh niloin khawvel ram lian hrang hrang a nghawng na hle a, dan bawhchhetu man chhuah dan kawng mumal zawk siam hi thuneitu tan chuan ngaimawh tham a tling.
IOC president Bach chuan, "WADA kalphung hi enfiah a ṭulin ka hria. Olympic-ah hian infiammi zinga dan zawm famkimte chauh inlan se tih hi kan duh leh duhthusam a ni a, chumi tur chuan a endiktu lam hi a langtlang ve tur a ni," a ti.
Bach chuan sawi chhun-zawmin, "IOC chuan khawvel pum huap Anti-doping system ṭha leh changtlung zawk neih a duh a, chu chu a langtlang nga, amahin a ding bawk tur a ni ang," a ti. Bach hian tuna WADA kalphung chu sawisel fak lo mah se a thusawi aṭang hian a duhkhawp lo tih a hriat theih.
WADA hnuaia Canadian law professor leh sports lawyer ni bawk Dr Richard McLaren-a chhuichianna a-
ṭangin Russia hian sorkar hriatpuinain an infiammite chu damdawi hman phal loh hman a zep ruk sak bakah an endikna chu felhlel takin a kalpui tih hmuh chhuah a ni. He thu avang hian WADA chuan IOC hnenah Russia chu Olympic-a inlan thei lo hrim hrim tura hrem turin a phut.
Mahse, IOC chuan Russian infiammi zingah a dan leh hrai zam zawm famkim thei an awm a nih chuan Olympic-a an inlan ve theihna tur kawng a hawn sak a, tun thlengin infiammi 250 chuang zet chu tel tlak nia ngaih an ni tawh. Weightlifting leh athletics-ah erawh Russian tan kawng a inhawng lo thung.
WADA ngena anga an kal loh avangin IOC hi demtu an tam mah se Bach-a ngaihdan a danglam phah lo, "Hei hian infiammi thianghlimte hnenah rah ṭha a chhuah ang. Dan zawm famkim chu inelna hmachhawn turin a tawk a, chawimawi a phu a ni," a ti.
Rio Olympic-ah hian Rus-sian infiammite chu Athletics leh Weightlifting-ah an tel phal loh bur ni mah se Archery, Badminton, Equestrain, Fen-cing, Handball, Judo, Shooting, Table Tennis, Tennis, Triathlon leh Volleyball-ah te an inlan thei dawn. Aquatics, Canoeing & kayaking, Cycling, Modern penthaton, Rowing, Sailing leh Wrestling-ah te chuan infiammi ṭhenkhat an inlan thei dawn lo a, nimin thleng kha chuan Boxing, Golf, Gymnastics leh Taekwondo-a an dinhmun tur a la chiang lo.