Everton-ah Aston Villa midfielder

Merseyside club Everton chuan Championship club Aston Villa aṭangin Idrissa Gueye an lalut a, Senegal midfielder man zatah hian pound maktaduai 7.1 bawr vel insengin season li chhung atan contract an ziahpui a ni.

Kum 26-a upa midfielder hian July 2015 khan French club Lille aṭangin Villa hi pound maktaduai 9-in a zawm a, Premier League-ah match 35 inlan mah se division hniam lama tla tur Villa a chhanhim zo bik lo.

Chinese sumdawng hausa Dr. Tony Xia hnuaia hmasawn tum Villa hian Gueye hi chelh duh mah se a release clause-ah pound mak-taduai 7 a inziah si avangin chelh a rem ta lo a ni.

Everton manager Ronald Koe-man chuan, "Idrissa hian kan midfield-a tih chak belhchhah dawn a ni. Season hman zawh takah khan midang ball ken lai chhuhsak hnem ber zinga mi a ni a, ani ang quality hi kan mamawh chu niin kan club-a zawm hi ka lawm hle a ni," a ti.

Kum 2011-a Ligue 1-a Lille cham-pion puitu Idrissa chuan, "Ka khelh dan hi Premier League tan a ṭha a ni. Goodison Park ka pan thei hi ka lawm a, fans ṭha tak an neih avangin inkhelh hlan ka nghakhlel tawh a ni," tiin a phur thu a sawi.