Ozone FC-ah Cornell Glen a lut

Mohun Bagan striker Cornell Glen chuan season thar atan Ozone FC a zawm. Bangalore club hi Dutch coach Bert Zuurman enkawlna hnuaia khel niin season hman zawh takah khan Bangalore Super Division champion an ni.

Trinidad and Tobago international hlui hian kum 2006-a an ramin World Cup an khelh ṭum khan match zawng zawng a khel kim vek a, kum 2013 khan Shillong Lajong zawmin India football-ah kan hmu ṭan.

LA Galaxy striker hlui hian Me-ghalaya club-ah hian season hnih hmangin vawi 38 inlanah goal 30 a khung sak a, Indian Super League hmasa berah NorthEast United zawm mah se match khatmah a khel lo.

Season hmasa ṭan dawn khan Mohun Bagan a zawm a, league match 16-a inlanah goal 11 khung mah se nomawi erawh a chawipui thei lo a, Federation Cup-ah erawh a champion pui thung.