Sigurdsson-a tan contract thar

Swansea City midfielder Gylfi Sigurdsson chuan Welsh club tan season li dang khelh chhunzawm turin contract thar a ziak. Kum 26-a upa playmaker hi Everton chuan pound maktaduai 25-in an ngam nia sawi ni mah se Wales club tana rinawm a thlang ta zawk a ni.

Sigurdsson hian Euro 2016 khelh zawh takah khan Iceland tan a inlan a, beisei loh taka quar-ter^-final an luhna kawngah an player pawimawh pawl niin ram tan match 41-a khelh tawhah goal 14 a khung.

Kum 2011-12 khan Bundesliga club Hoffenheim aṭangin Swansea-ah hian loan-in a lo khel tawh a, mah se Wales club-ah hian cham chhunzawm loin Tottenham Hotspur a pan. London club tan season hnih a khelh hnuah Swansea hi 2014 khan a nghetin a zawm leh a ni.

Swansea hian an striker pathum Eder, Alberto Paloschi leh Bafetimbi Gomis te chu nipui bazar-ah an chan tawh a, Ghana forward Andre Ayew chu West Ham nen sawizawm mek an nih bawk avangin Sigurdsson-a'n rinawmna thu a tiam thar hi Swans boss Francesco Guidolin tan chuan thawk huaina tham a ni ngei ang.