Sanjeev-a'n Primeira Liga a pan!

Indian rawlthar duhawm Sanjeev Stalin chuan European football khel turin Portuguese top division club C.D. Aves a zawm a, kum 19 mi defender hian kum hnih chhung atan contract a ziak. 

India tan FIFA Under 17 World Cup lo khel tawh Sanjeev Stalin hian thla li zet chu Primeira Liga club-ah hian training a nei tawh a, Under 19 leh Under 23 tan a khel phawt ang. 

Indian Arrows tana season hnih lo khel tawh defender hian U19 leh 23-ah beisei anga a khel a nih chuan contract thar zawrh a ni dawn a, senior team-ah khelhna chance a nei thei dawn a ni. 

CD Aves hian team 18 inelna Portuguese Primeira Liga-ah a mawngphah an luah mek a, league match 20 an khelh tawh aṭangin poiint 12 chiah an la nei. 

Mahse, he team hian an league match hnuhnung paliah vawi hnih hnehna an chang thei a, relegation zone chhuahsan turin chance an la nei ṭha hle - an chunga awm Portimonense SC (14 points), Futebol Clube Pacos de Ferreira (16) leh Clube de Futebol Os Belenenses (18) te nen an inhnaih hle.