I Day Football 2016 Chak inring ve ve; chak loha tla thei ve ve Aizawl FC Vs Chhinga Veng FC

'Chak kan inring' tiin Aizawl FC leh Chhinga Veng FC coach-te'n Vanglaini palai an hrilh ve ve a, ring sual an awm dawn tih erawh a chiang.

Vawiin chhun dar 12:00 hian Lammualah an thusawi tihdik tumin an inhmachhawn dawn a, club pahnih tan chuan 'final' ang hiala chhal theih a ni.

Phuba lak hun

Nikum Aizawl DFA hnuaia inelnaah Aizawl FC Academy-in league round-ah hneh loh an tawng lo a, amaherawhchu final-ah Chhinga Veng FC an hneh loh avangin pahnihna an ni.

Aizawl FC-in an rawltharte tana phuba lakna hun remchang an nei ta a, vawiina an chak zawh leh si loh chuan club tana mualphona a ni.

Rohminga fiahna

Mizo midfielder zinga ngaih-nat hlawh ber zinga mi Ro-hmingthanga inkhel zuna uai tlat an awm a, amaherawhchu Lengpui tlangval hian season liam taah hun tam zawk a âwl avangin Chanmari FC nen an khelh ṭumin tun hma a pha lo.

Inhliam vangin veteran midfielder hi AIFF Academy an hmachhawn ṭumin a tel ve lo a, vawiin hian a la ṭha reng em tih fiahin a awm ang.

Chullova an ring

Aizawl FC defender Lal-ram-chullova'n season tharah mawh-phurna tam zawk a nei a, freekick pettu a nih bakah pe-nal-ty thlengin a pet tawh. Armed Veng tlangval hian AIFF Academy an hmachhawn
ṭum-in penalty a pet goal lo a, chuti chung chuan coach K. Malsawmkima chuan Vanglaini palai hnehah penalty an hmu leh a nih phawt chuan Chullova thoin a pet tur thu sawi.

Goal khung tur?

Bright Middleton Mends-a'n Aizawl FC tan match hnih inlan tawhin goal khat a khung tawh a, record chhia niin lang lo mah se Ghanaian forward hi goal hmaah a hlauhawm tawk lo.

Mends-a goal thun chhun hi striker tam zawk khung theih a ni a, foreigner a nihna anga special-na bik a la nei lo. Aizawl FC hian goal khungtu an mamawh a, Ghanaian forward a chet theih loh chuan player dang an pen chhuah a ṭul ang.

Dawngtea a dam

Chhinga Veng-in thu lawm-awm a nei ve ta a, an striker chhuanvawr MS Dawngliana chu Aizawl FC hmachhawn turin a dam.

MPL-a top scorer leh best forward chawimawina dawng tawh Dawngtea bakah hian Chanmari West an draw
ṭuma goal pawimawh khungtu midfielder Paul Ramfangzauva a inkhel thei tawh bawk.

Attacking football

Ramhlun North-in Shillong Lajong lakah an ṭha lo zawk tih hre reng chungin attacking football an khel a, goal li an chhuah. Chhinga Veng aiin Aizawl FC hi an lian zawk a, amaherawhchu MPL kaithar hian point thum an hlawhchhuah loh chuan semifinal kawng a inkhar ang.

Chhinga Vengin mualpho pawi ti loin attacking football khelh an tum a, Aizawl FC lamin goal khung tuma an khelh ve dawn tho avangin chhun inkhel tur mah ni se a hmuhnawm khawp ang.

Coach thukhawchang

Aizawl FC coach Mal-a chuan, "Chhinga Veng hi club insiamṭha mek an ni a, team ṭha din nghal hi chu a harsa ang. Chutihrualin Chanmari FC an hneh loh ṭum aṭanga teh chi an ni lo a, kan khelh hunah chuan an player eng emaw zat an dam ṭha tawh ang. Engpawh chu ni se chak tumin kan khelh a
ṭul tawh a, kan chak ngei pawh ka ring," tiin team ṭha zawka a inngaih thua sawi.

Chhinga Veng FC coach Lalremtluanga chuan, "Football club ka enkawl tawhah chuan tun ṭum hi player kan neih
ṭhat ber a ni. Amaherawhchu hetiang taka inhliam nghah
ṭum hi ka la nei ngai lo a, kan chunga roreltu Pathian hian min fiah a duh ang chiahin group stage patlang lo tur chuan kan chungah ro a rel ka ring lo. Semifinal luh beiseina chhawm nung zel turin kan chak ka ring," tiin an chak a rin thu a sawi ve bawk.