Wolfsburg chhuahsan duhtu Draxler

Germany international Julian Draxler chuan a club khelh mekna Wolfsburg-ah kum khat hun a hmang hman chauh tihin Bundesliga club chu chhuahsan a duh thu a sawi.

Kum 22-a upa winger hian season hmasa ṭan dawn khan Juventus leh Arsenal en kanin Wolfsburg hi a zawm a, tunah erawh Volkswagen Arena-ah cham chhunzawm zel ṭulna a hre tawh lo.

Wolfsburg tan match 39 inlana goal kaw khungtu winger chuan, "Vantlang hriata ka puanzar kher ngai lo hian Wolfsburg hian an duh chuan hma an la thei. Euro khelh zawh rual khan coach Dieter Hecking hnenah chhuah ka duh thu ka sawi nghal a ni," tiin a lungawi lo hle.

Germany tan vawi 24 inlana goal hnih khungtu Draxler chuan Wolfsburg a zawm hma khan club technical director Klaus Allofs leh coach Dieter Hecking te chuan amah duhtu club langsar an awm a nih chuan chhuah an phal tur thu hrilh vek niin a sawi.

Euro 2016 khelh zawh taka Germany tana inlan Draxler hian Wolfsburg-ah kum 2020 thleng cham turin contract nei mah se amah berin chhuah a duh thu a sawi takah chuan German winger duhtu Arsenal an thaw huai ngeiin a rinawm.