Arsenal leh Mahrez thawm a lian zel

Leicester City winger Riyad Ma-hrez chuan Arsenal zawm turin thutlukna a siam fel tawh niin Algerian website Le Buteur chuan a tarlang.

Arsenal hian Jamie Vardy lakluh tumin Leicester City an dawr tawh a, English forward hian Gunners hi a hnar. Hemi hnu hian Foxes-in Premier League an champion theihna tura player pawimawh N'Golo Kante chuan Chelsea sawmna a hnar zo lo a, Algerian winger pawh hian champion team-a khelh aiin team ṭha zawk Gunners a pan ngei a rinawm ta.

Algerian website Le Buteur chuan huai takin Mahrez-a agent Kamel Bengougam leh Arsenal boss Wenger te an inhmuh hnuah PFA Player of the Year Mahrez-a'n Emirates Stadium pan turin thutlukna an siam niin an ziak. Hetah hian duhtawk mai loin season hmasa a league-a goal 17 khungtu hian London club-ah hian kar khatah £100,000 a hlawh dawn tih thlengin an tarlang tawh.

Kartawpa Leicester City leh Paris Saint-Germain ten friendly match an khelh khan Arsene Wenger-a'n a hmunah a en a, French manager hian Algeria international hi a thlitlai ngei nia ngaih a ni a. Tuna Arsenal zawm ngei tura an ziah tak avangin Mahrez leh London club an sawi zawmna hi thuthang leng vak mai mai a ni tawh lo a, chutihrualin he thu buatsaih lai hi chuan thuchiang hriat a la ni lo.

Gunners leh Mahrez hi January transfer hun lai pawh khan sawi zawm an lo ni tawh a, khami
ṭum khan £400,000 leka Le Havre
aṭanga Leicester City zawmtu hi pound maktaduai 29 man nia ngaih a ni tawh. Tunah kum em pawh la ral lo mah se Algerian winger hian Premier League nomawi a chawi leh tawh avangin uchuak taka pawisa hmang ngai lo Wenger-a meuh pawhin tlawm te chuan a lei bik lo ang.

Arsenal hian August 14 hian Premier League-a an match hmasa berah Liverpool an hmachhawn dawn a, hemi hma ngei hian Mahrez hi lakluh fel an tum dawn a ni.