Foden leh Greenwood te an thawn haw

England chauh ni loin khawvelin beiseina sang tak nena an thlir Phil Foden leh Mason Greenwood te chu Icelandic nula an hotel-a an hruai luh avangin an haw tir.

Foden leh Greenwood hian coronavirus quarantine dan a bawhchhe satliah lo a; anmahni avangin England manager Gareth Southgate, an teammate-te leh an fan-te an ti hnual a, an club khelhna Manchester City leh Manchester United an ti mualpho bawk.

Reykjavik Metropolitan Police thupuangtu chuan English player pahnih chu 250,000 Icelandic krona (Rs nuai 13) an chawitir thu an puang. 

Kum 20 mi Phil Foden hi England-in Iceland 1-0 a an hneh ṭumin bul an ṭan a, kum 18 mi Greenwood-a pawh bench aṭangin a lut ve bawk. Player pahnih hi senior team-a an vawi khat lanna ve ve a ni a, nizana Denmark an hmachhawn ṭumin an tel ve ta lo.

England manager Gareth Southgate chuan, "An pawi khawih hi a lian tham a, a ṭul angin hma pawh kan la nghal. An kum zat kan hria a, amaherawhchu khawvelin coronavirus vanga buaina kan tawh lai a nih avangin tih theih chin kan nei," tiin loh theih loa thawn haw an ṭul thu a sawi.

Kum 50 mi Southgate chuan, "Kan pawm vek lo a ni thei a, kei chuan anmahni hi ka thlawp zel dawn. An harsatna hi tih belhchhah ka duh lo. An chunga ka rilru put hmang ka hrilh chiang a, tuna an mualphona hliah khuh tur hian an thochhuah a ṭul a ni. An kum a la naupang a, thil an thlir thiam a ṭul hle," tiin a sawi a, Foden leh Greenwood tan England khelhna kawng a la hawn rualin Euro 2020 khelh phak a harsa sawt ang.

England-in inkhel turin Reykjavik an tlawh. Iceland khawpui Reykjavik hi mipui nuai khat leh sing thum vel lek chenna niin Aizawl aiin a te zawk a, mipui cheng pawh an tlem zawk.

Three Lions-in Iceland an hneh zawhah Foden leh Greenwood hian an thlenna hotel-ah Icelandic nula pahnih an chahlut. Southgate chuan, "England team awmna chinah chuan engmah a thleng lo," tiin a sawi a, chutihrualin a naute pahnih chetna hi team awm lohna hotel chhung tho siah a ni.

FA thupuangtu chuan, "Phil Foden leh Mason Greenwood te hian team awmna hmun ni loah mi hrang an lo kawm a, hotel chhuahsan lo mah se dan an bawhchhiat miau avangin an thil tih hi pal zam theih a ni lo," tiin hotel chhung a nih thu a sawi.

England player-te nena inkawmte hi Iceland Miss Universe contender Nadia Gunnarsdottir leh a unaunu (cousin) Lara Clausen te an ni a, an inbiakna video vel hi social media-ah a darh bawk avangin an mualphona hi thup theih a ni lo.

Greenwood hian 2019-20 season-ah goal 17 a khung a, a vawi khat nan ram tana khel turin an ko. Foden hi India-in FIFA Under 17 World Cup an thlen ṭuma best player kha a ni a, season liam ta khan Pep Guardiola hnuaiah player pawimawh a ni pha. 

Manchester City chuan Foden-a chet dan chu Manchester City player leh England international player tih loh tawp tur a nih thu an sawi a, Manchester United pawhin Greenwood-a chet dana an lawm loh thu an sawi bawk. 

Kil tin aṭangin Greenwood leh Foden sawiselna leh demna a ri chhuak a, hetiang karah hian chhantu an nei ve bawk. England international hlui Trevor Sinclair chuan, "Mipa an ni miau a. Keimahni player-te ngei hi chu ti chhe lo ang u. Kan thil tihsual aṭanga inzir hi a ṭul ṭhin," tiin a chhan.