Barcelona-in Mario Gomez an rim

Euro 2016 hman zawh taka Germany tana inlan Mario Gomez chu Barcelona leh Borussia Dortmund ten lakluh tumin an hel mek nia sawi a ni a, Europe club lian pahnih inkarah hian Besiktas an inrawlh ve bawk.

Kum 31-a upa striker hian season hman zawh takah khan Fiorentina aṭangin Besiktas chu loan-in a zawm a, vawi 41 inlanah goal 28 khungin Turkish club hian an hnena cham chhunzawm turin an sawm.

Mahse, Germany tan vawi 68 inlana goal 29 khungtu striker hian Turkey tualchhung buaina avanga Besiktas a zawm theih loh thu hi a lo sawi tawh a, mah se Turkish club hi an beidawng duh lo.

Besiktas thupuangtu Metin Albayrak chuan, "Kan fan-te chuan Mario Gomez kan neihlet leh theih hi an beisei tlat a ni. Gomez hi uluk takin kan chhui zui reng a, a pawi ber chu Barca leh Dortmund te nen inbiakna khunkhan tak an nei hi a ni. Kan tan chuan a harsa zual sauh dawn," tiin tlawm mai erawh an tum hmel loh hle.

Metin Albayrak chuan Gomez duh ve anga an sawi West Ham boss Slaven Bilic chu phone-a a biak thu leh Hammers manager hian Gomez lakluh tumna a nei lo tih a hrilh thu a sawi.