Santosh Trophy: Vawiinah Mizoram an inlan dawn

78th National Football Championship for Santosh Trophy 2024-25-ah Mizoram chu vawiin tlai dar 4:00 hian an inlan dawn - match hmasa berah hian inelna thlengtu Tripura an hmachhawn dawn a, he thu buatsaih a nih lai hian live a nih dawn leh dawn loh a la chiang lo.

Mizoram hian October thla tawp lam aṭang khan inbuatsaihna Rajiv Gandhi Stadium, Aizawlah an nei ṭan tawh a, Mizoram coach B. Malsawmzuala chuan inelna hmachhawn tura an inpeih tawh thu Vanglaini a hrilh.

Nikum khan Mizoram hian Santosh Trophy-ah semifinal an thleng a, kum 2014-a champion nomawi an chawi hnu khan Mizoram team hi India rama state leh state inelnaah hian an champion leh tawh lo.

Mizoram hi Tripura bakah Manipur leh Sikkim te nen group khatah an awm ho a, an inkhelh kual vek hnuah a sang ber chauhin final an lut dawn. A tawi zawnga sawi chuan vawi khat chetsual a pawi tihna a ni a, vawiinah chetsual a thiang lo ang.

An in 'fit'

Mizoram Premier League khelh hnu lawkah Mizo player-ten Santosh Trophy atan inbuatsaihna an kalpui nghal a, an tha zat vanglai taka training nei chhunzawm an nih avangin inelna hmachhawn turin an inpeih tawh hle.

Coach Sawmtea chuan, "Training kan nei ṭha a, kan duh angin kan inbuatsaih thei. Agartala kan thlen hnuah pawh kan duh angin kan inbuatsaih chhunzawm a, lungawi lohna tur a awm lo," a ti a, Tripura-in an mikhual dan pawh a ṭhat tawk thu Vanglaini a hrilh.

Aizawl FC coach hlui chuan sawi zawmin, "Kan player zingah inhliam kan nei miah lo a, kan vannei hle. Ka player-te hi duhthusam an ni a, a khel tur ber pawh thlan harsa khawpin an intluk tawk a ni," a ti a, an ṭhat dan bera an inlan theih tur thu a sawi.

Tun dinhmunah Tripura boruak hi lum uchuak tak a ni lo a, vawiin bikah chuan tlai ni nema inkhel tur an nih bawk avangin a harsa lo tura ngaih a ni - football a ni miau a, fimkhur erawh a finthlak dawn.

Tlarhnung hi

Mizoram tana bul ṭan tur chiang kan thlang dawn a nih chuan keeper Zothanmawia hi a ni ang - Chanmari FC keeper hian season duhawm tak a hmang zo chiah a, Indian football thlenga tawnhriat nei ṭha a nih bawk avangin a tawnhriat ringawt pawh a hlu dawn.

T. Mawia tia hriat lar keeper hian national games-ah Mizoram tan gold medal a lo hlawh chhuak tawh a, club football leh Mizoram tana fehchhuahah pawh sulhnu a nei nual.

Tlarhnung laiah Kerala United defender Lalmuanawma (Munez) chu bul ṭan chiang tura beisei a ni a, a kawppui turin Chanmari defender A. Vanlalremruata nge Lalhmangaihsanga lut zawk ang, tih chu sawi thiam harsa a ni rih.

Left back-ah Mizoram Police fullback Lalruatpuia leh SYS FC captain F. Malsawmtluanga ten hmun an inchuh ang - Malsawmtluanga hian MPL11-ah khan ball pet a thiamzia a pholang tawh a, player theihna nei sang, Sihphir Venghlun right back C. Zohmingsanga pawh bul ṭan tura beisei a ni.

Midfield a 'ṭha'

Tun Santosh Trophy-a Mizoram squad tichhahtu ber chhal dawn ila, midfield lam kan hawi ṭhup mai thei - Indian football thlenga hming chher tawh Malsawmzuala'n Chanmari tan season duhawm tak a hmang a, a ṭangkai dawn.

Hetihlai hian coach Sawmtea'n 4-3-3 formation a hman tur thu Vanglaini a hrilh a, chuti a nih chuan Malsawmzuala leh Police midfielder ṭha, National Games-a gold medal la tawh H. Lalbiakthanga (Bta) ten bul ṭan an inchuh dawn tihna a ni.

MPL season hman zawh taka Emerging player atana thlan Michael Lalbiaksanga pawh bul ṭan tura beisei a ni a, Tlangmawi rawlthar hi a kum la nau deuh mah se, Police-in MPL final an thlen theih nan player pawimawh a ni a, I Day Football-ah Police hi champion nomawi chawipuiin, Best Player atan thlan a ni bawk - thlauh thlak chi a ni lo.

Mohammedan SC midfielder Lalngaihsaka (Ngaihtea) pawh bul ṭan tura beisei a ni a, a kum a la nau deuh avangin Indian Super League-ah a hming ziah luh a la ni rih lo a, Santosh Trophy a khelh theih phah - Mizoram tan malsawmna a ni.

Khawpui a ri dawn?

Lalkhawpuimawia'n season hman zawh takah khan hliam nei chungin MPL a hmachhawn a, heti chung hian player langsar a ni tho - I League 3-ah pawh Kelkang tlangval a langsar a, Tripura khawpuiah Mizoram team tlarhma luahlumtu a ni dawn.

Mapuia thachhang dawltu ni turin F. Lallawmkima a awm a, Mizoram Police forward hi striker dinhmun luah tura tuai hnum niin, substitute bench aṭanga luta danglamna thlen ṭhin tura beisei a ni ang.

Tlarhmaah Mizoramin Lalthankima (Thathana) an nei bawk a, Mohammedan SC forward hi Sawmtea'n Kolkata club langsar Kalighat MS a enkawl lai pawha Lungdai rawlthar Ngaihtea nena a 'chhawm' ngat kha an ni a, bench-a dah atan chuan a ui ang!

Mual sir lehlama tlan turin Moses Lalrinzuala a awm bawk a, Chanmari FC forward hian season hman zawh takah khan MPL a khelh ṭhat bakah I League 3-ah a hming a chher tel bawk. Hetihrual hian MPL khelh zawh taka Sihphir Venghlun tana goal ruk khungtu Lalthanpuia a awm ve tho a, lut chiang a sawi theih loh.

Tripura phawt!

Mizoram tan football aṭanga tehin Tripura an nau a, mahse, chuvanga ngaihthah thiang erawh a ni lo - nikum khan qualifier-ah awlsam taka hneh tura ngaih Uttarakhand leh Sikkim chu Mizoram hian 1-0 ve ve chauhin an hneh!

Tripura-in group stage an thlen avangin final round inpetkai ngei an tum a, an theih anga ṭha player an indapkhawm a, mahni mualah mualpho an hlau takzet.

Mahse, Mizoram manager S. Malsawmtluanga chuan, "Football chu team game a ni a, mimal player ṭha tak tak, inhrechiang lo leh khel ho tam lo lakkhawm hian awmzia a nei lo - team anga khelhchhuah a ngai," tiin Vanglaini a hrilh a, a huphurh lo.

Mizoram hian November 17, Pathianniah an match hnihna turin Manipur an hmachhawn dawn a, ngaihven a hlawh nghal hle - nikum khan final round group stage-ah Manipur hi 4-1 ngawtin Mizoramin an hneh lo a, final round thleng lo tura petchhuah hi Mizoramin an châk a, mahse, he inkhel boruak ti 'hot' tur hian vawiinah chak phawt an mamawh.