Mizo weightlifter-te an hlawhtling

India ram pum huap inelna - All India Inter SAI Weightlifting Championships 2024 chu nimin khan neih zawh a ni a, inelna hmachhawna kal Mizo infiammite an che ṭha hle a, silver medal pahnih leh bronze medal pali an hlawh chhuak.

Patiala, Punjab-ah November 11-14 chhung khan inelna neih niin, mipa 89kg huangah MH Daniel Beichhuasa chuan silver medal a chawi chhuak. Siaha tlangval hian pahnihna ni turin snatch 93kg, clean & jerk 131kg, a total-ah 224kg a chawi.

MH Daniel Beichhuasa hi Khelo India State Centre of Excellence, Aizawla inzir lai niin, Sports and Youth Serices coach Malsawma Khiangte kaihhruaina hnuaiah kum 2002 aṭang khan weightlifting a zir ṭan a, tun ṭum hi ram pum huap inelna bikah chuan medal a lak hmasak ber a ni.

Hmeichhe 55kg huangah C. Lalhruaizeli chuan snatch 42kg, clean & jerk 63kg, total 105kg chawiin bronze medal a la. Lalhruaizeli hian kumin aṭangin SAI-ah weightlifting a zir ṭan chauh, Khawzawl mi hian rit chawi a luhchilhna la rei lo mah se a hlawhtling hma hle.

Cindy Lalparmawii chu 76kg huangah inlanin, ani hian snatch 54kg, clean & jerk 65kg, total 119kg a chawi a, a rit chawi hi Youth & Junior huangah teh nana hman niin bronze medal ve ve a la. Kolasib mi Lalparmawii pawh hi Khelo India hnuaiah SYS coach Malsawma Khiangte kaihhruaina hnuaia inzir.

Khelo Indian chhul chhuak dang Zosangzuali pawin +81kg huangah medal a la. Keiṭum nula Zosangzuali hian snatch 62kg, clean & jerk 75kg, total 137kg a chawi a, a rit chawi hi Youth huangah bronze medal a lak phah laiin, Junior huangah chuan silver medal lak nan a tling tawk thung a ni.

Mizoram coach Malsawma Khiangte chuan, "Kan nauten Mizoram tan theihtawp an chhuah a, an thlen chin hi a lawmawm hle. Kum naupang tak tak an ni hlawm a, ṭhenkhat phei chuan weightlifting an luhchilhna pawh a la rei lo.

"Kan inbuatsaihna leh theihtawp kan chhuahna chu Pathianin mal min sawmsak a, tun hun hi kan thleng. Mizo mipui tam takin min ṭawngṭaipui tih kan hria, kan hlawhtlinna avang hian Pathian hnenah lawmthu kan sawi leh tur a ni ang," tiin Vanglaini a hrilh.