Liverpool kan ṭha tawk - Salah

Premier League hmahruaitu Liverpool forward Mohamed Salah chuan English top flight league nomawi chawi tura an ṭhat tawk thu a sawi a, mi tam takin rin hlawh lo leh beisei loh ang taka team che ṭhaa an ngai chu a pawm ve lo.

Salah chuan, "Ka duh ber chu inelna ka hmachhawn apianga chak vek hi a ni. Ni tinin rim takin ka thawk a, champion tura rin kai zinga kan tel lo ṭhin hi ka haw takzet. Khawvela team ṭha ber pawl kan nei a, position tinah hian khawvela a ṭha zual top 3-a lang phak tur an awm zel. Chutiang a nih chuan eng vangin nge kan champion loh ang?" a ti a, an champion theih a ring tlat.

Egyptian forward chuan, "Liverpool khawpui leh club hi chuan a hmaa inchhawp apiang hlawhchhuah tumin a bei zel tur a ni," a ti - Reds hian coach thar Arne Slot enkawlna hnuaiah, inelna hrang hrangah match 17 khel tawhin vawi 15 an chak a, vawi khat chiah an la tlawm.

Champions League leh Premier League-ah hmahruaitu an ni a, Carabao Cup-ah quarterfinal an lut tawh bawk. Hei vang hian Salah-a'n inelna an hmachhawn zawng zawnga nomawi chawi vek a duh thu a sawi pawh hi a awm hle.

Hetihlai hian Reds thiampuipa hi Virgil van Dijk leh Trent Alexander-Arnold te nen season tawp rualin an contract a zo dawn a, tun thleng hian contract thar an la ziak lo.

Salah chuan, "Ni tinin AXA training centre-ah hun ka la hmang a, nuam ka ti takzet. Thil kal tawh ka thlir kir chang pawh hian, player chhuak tate ka ngaihtuah fo a, nuam an tizui em ka hre lo. Kei erawh chuan second tin mai hi nuam ti takin ka hmang a ni.

"Engtikah emaw chuan ka career hi thlirkir a, engkim kha nuam ka ti em em a ni, tih hi ka duh a ni," a ti - Salah hian Reds tan tun season inelna hrang hrangah match 17 khela goal 10 khungin assist vawi 10 a nei a, football khawvela player 'hot' ber pawl a ni mek.