Alcaraz tan beisei tur a la awm

Carlos Alcaraz chu a match hmasa berah chak lo mah se a chesual nawn lo - Nilaini zan khan ATP Finals 2024 group match pahnihna khelin, a khingpui Andrey Rublev chu 6-3, 7-6 (10-8) in a hneh.

Spanish star hi Thawhlehni zan khan a awm (chest) a nuam lo a, training pawh a nei rei thei lo. A inhnukdawk mai dawn emawni tihna pawh a lian hman, mahse Russian tlangval lakah ṭha taka inlanin a chak.

Kum 21 mi Alcaraz-a'n a tir aṭangin a khel ṭha hle a, semifinal beiseina tinung turin chak ngei ngei a ngai tih a inhrechiang. Vawi 33 ngawt winners vaw chhuakin, a khingpui service vawi hnih a chhuhsak chu chak nan a hmang tlang.

Seeded pathumna Alcaraz chuan, "Keimah ngei pawhin ka khelh chhuah dan kha rin harsa ka ti, a bik takin baseline aṭanga ka beih let ṭhin kha ka ka beisei phak baka ṭha a ni hial.

"Ka nawmsam lohna leh thil dang ka ngaihtuah duh lo a, match khelh lai bak ka rilruah ka dah ngai lo. A tawpah chuan ka beisei ang tak a lo thleng ta a ni," tiin a sawi a, a khelh danah a lungawi hle.

John Newcombe Group inkhel dangah Alexander Zverev chuan Casper Ruud lakah 7-6 (7-3), 6-3 in hnehna a chang ve bawk a, zanin hian an group match hnuhnung ber atan Alcaraz nen an inhmachhawn leh ang.

German tlangval Zverev hian a vawi thum nan ATP Finals nomawi chawi a tum a, a hmachhawn hmasak pahnih chu a hneh ta. Rudd a khel chhe lo a, set khatna bikah phei chuan a service hmasa paruk chauh dik lo a awm.

Mahse, a khingpui Zverev a chesual duh bik lo. Inhnehtawk taka an inbeih hnuah tie break khelh niin German tlangval a dingchang a, set hnihnaah chuan tunlai player ṭha zawk a nihna langin a chak tlang.

Kum 27 mi Zverev chuan, "Keimah chauh ni loin Ruud pawh khan a khel ṭha takzet a, chutiang kara hnehna changtu nih chu a hlu zual bik ṭhin. Match hmasa zawk aiin hmasawnna hmuh tur a awm te khan min tilawm," tiin a sawi.

Seeded pahnihna Zverev hi a match hnuhnung berah a chak a nih chuan, midang result ngaihchan tel ngai loin semifinal a lut ang. Chak lo pawh ni se, set a la hrim hrim a nih chuan tlang turin a dinhmun a ṭha a, midang result a zirin an group aṭanga tlang tura dinhmun ṭha ber a ni.

Mipa tennis season kharna tournament-ah hian kum 2018 leh 2021 khan Zverev hi a lo champion tawh, tun ṭuma inlan player pariat zingah chuan sulhnu nei ṭha ber niin, an group bikah phei chuan tun hma lama champion thei an la awm ve lo.