Wembanyama hoin Spurs an chak

Victor Wembanyama chuan nimin zing khan a thiam thil a lantir a, point 50 ngawt mai neiin a team San Antonio Spurs chu Washington Wizards lakah 139-130 in a chakpui.

Wembanyama hi kum 20 mi chauh a la ni a, a sulhnu hnutchhiah hi a nep lo hle. NBA huangah Brandon Jennings, LeBron James leh Devin Booker te chauh hi kum 20 pelh hmaa match khata point 50 nei tling thei an ni, tunah chuan an kiangah Wembanyama-a hming ziah a ni ve tawh ang.

Spurs centre Wembanyama hian tun hmain point 40 neih ṭum chu a lo nei tawh, tun ṭuma point 50 nei tur hian minute 32 chauh hun a hmang a, 3-points vawi riat a vawm luh pawh mimal a tih ṭhat ber ṭum a ni nghal bawk.

Wenbanyama chuan, "Match kan khelh hmaa taksa kan tih lum lai pawh khan nuam ka ti tawh hle a, eng emaw tak tawng tur ang mai khan kan phur em em bawk, engkim mai kha duhthusam ang vekin a thleng a ni ber mai," tiin a sawi.

Spurs hi an coach Gregg Popovich chu a damlo mek, kum 75 mi Popovich hi tun thlatir lam khan a stroke a, hei vang hian enkawl mek niin a team a kaihhruai theih hun tur sawi theih a la ni rih lo.

Inkhel dangah Giannis Antetokounmpo a langsar hle - Greek tlangval hian tun season chhunga a point neih tam ber ṭum tawngin point 59 tehmeuh a nei a, over time an khelh zawh hnuah a team Milwaukee Bucks chu Detroit Pistons lakah 127-120 in a chakpui.

Most Valuable Player (MVP) vawi hnih ni tawh Antetokounmpo hian basketball inelna sangah hian, match khata point 50 neih tlin vawi kua ngawt a nei tawh a, a point neih hnem ber chu season hmasa a Indiana Pacers nen an inkhelh kha niin, point 64 ngawt a nei.

Cleveland Cavaliers an la chak tluang zel bawk - Cavs hian a zawna match 13 an chakna ni turin Philadelphia 76ers chu 114-106 in an hneh a, tun season kal laia match an khelh hoah hnehna an la chang fai vek.

Los Angeles tan LeBron James bawk chu mamawh chhanna a ni leh bawk. James hian a zawnin vawi thum ngawt mai triple-double a nei ta. Lakers hi Memphis Grizzlies lakah 128-123 in a chak pui, tun season atan an mikhual apiang an la hneh vek a ni.

James hian point 35 a neih bakah assist vawi 14 neiin rebound ṭum 12 a la bawk a, ani bakah hian match dang ang bawkin point 21 a neih bakah rebound vawi 14 latu Anthony Davis a langsar leh hle.