Laporte-a'n Real pan a hreh lo

Real Madrid nena sawi zawm hlawh mek Aymeric Laporte chuan Spanish champion hi pan a hreh loh thu a sawi chhuak a, a khelh mekna Al Nassr tan an defender kam chhuak hi hriat a nuam lo ang.

Spanish La Liga table-a pahnihna ni mek Real Madrid hian tun dinhmunah centre back rin tlak 'fit' chu pakhat chauh neiin, Antonio Rudiger a ni - kar hmasa khan Eder Militao chuan a khup tihliamin a chawlh rei a rinawm a, December thlaa khup zai David Alaba a la dam chiang lo bawk.

Kum 27 mi Jesús Vallejo hi centre back chu a ni ngei a, mahse, tun season-ah vawi khat chiah an la chhawr - an ringtawk lo tih a chiang. Hetiang boruak karah hian Laporte hming an lam ri mek.

Manchester City defender hlui chuan, "Madrid hian min rawn be ta se, engvangin nge ka hnar ngawt ang? An duhdante kan ngaithla ve ang chu - Real ang team langsar hi chu an en hniam theih tak tak ngai lo," a ti.

Spain international Laporte hian kum 2023 nipui lai khan Manchester City chhuahsanin, Real Madrid hi a pan a, a man zat hi euro maktaduai 27.5 niin, kum thum chhung atan contract a ziak. Mahse, January thla khan Saudi Arabia nuam a tih loh thu a lo sawi tawh.

Laporte chuan, "Europe-ah ka chhungte zawng zawng an awm vek a, kir leh ngei hi chu ka rilruk reng a ni," a ti a, Madrid hian an duh tak tak a nih chuan dawr a nuam dawn tih a chiang!

Kum 30 mi defender chuan Saudi football chungchang sawi chhunzawmin, "Hmasawnna tur an la ngah hle. Kum rei lotê liam taah khan football-ah hian rilru an seng ve ṭan tak tak chauh a, an duh dan a zirin a ṭhang chakin, a ṭhang chak lo thei," a ti - a duhthu an la sam chiah lo.

Hetihlai hian Real Madrid hi an captain hlui Sergio Ramos la lut leh tura sawi an ni hman bawk a, season hman zawh taka Sevilla a chhuahsan hnuah khan kum 38 mi hian club khelhna a la nei leh lo.

Mahse, thu thar berah chuan Real thuneitu tam zawkin Ramos hi lak let an duh lo. Tuna an buaina thlirin, kum upa ve tawh tak defender hi buaina chingfel nghal thei turah an ngai lo a, kum 30 mi Laporte hian an lung a len ta zawk niin a lang.