Dinsanga leh Decardi inhnek hun tur a chiang

Dubai-ah inhnek thei lo mah se LPS Pro Fight champion Laldinsanga'n tun thla tawpah WBC Youth World title a chuh dawn a, Michael Decardi Nelson nen an inhnek ang.

Grassroot Boxing hmalaknain November 30 khian White House, Bangalore-ah boxing show ropui tak huaihawt a ni dawn a, inhnek pui berah kum 21 mi Dinsanga leh Ghanaian fighter Michael-a an inhnek dawn. Ramthar, Lunglei boxer a chak a nih chuan Mizo zinga WBC Youth world champion ni thei pahnihna a ni dawn.

Pro Fight bantam-weight champion Dinsanga hian November 9 khan Dubai-ah inhnek tumin inbuatsaihna ngawrh takin a kalpui a, WBC Youth world title a chuh theihna tura inhnek pawimawh ni mah se hliam vangin a puitlin thei lo.

Chuti chungin hun ṭha a nei zui thei dawn a, professional huangah ṭum riat a inhnek tawhah chak vekin mi panga a knockout. September 24 khan Bangalore-ah tawnhriat nei tawhin awlsam takin Mohamed Junaid a hneh a ni.

A hmaa ding tur kum 22 mi Michael hian professional huangah hnuhma ṭha tak nei ve bawkin, vawi kua a inhnek tawhah tlawm nei loin ṭum riat a chak. March 24 kha a inhnek hnuhnun ber niin Ghanaian khawpui Accra-ah Sodiq Adeleke a hneh.

Inhnek dangah Pro Fight middleweight champion C. Lalhruaitluanga'n WBC India title a chuh dawn bawk a, Ritesh Singh nen an inhmachhawn ang. Kum 27 mi Hruaia hian pro boxing a luhchilh aṭangin vawi sarih hnehna a chang zawn a, a inhnek hnuhnun vawi hnihah Kazakhstan leh Abu Dhabi-ah fehchhuakin a tlawm ve ve thung.

WBC India champion Mizo boxer pahnih Vanlalawmpuia leh F. Zoramchhana pawh an inlan dawn a, Awpa'n Ugandan boxer Kagimu Ivan Kigga bitumin Cherhlun tlangval Zotea leh Filipino fighter Norberto Tano an innuai dawn a ni.