Amsterdam-ah Italy-in Netherlands an hneh

Thawhṭanni zan inkhelah Italy-in inkhel an thunun a, Nicolo Barella tauh luh hmangin mualneitu Amsterdam 1-0 in an hneh. Roberto Mancini hote hi an match hmasa berah Bosnia and Herzegovina nen inhnehtawk mah se match hnih khelh zawhah point li  hmuin an group-ah hmahruaitu an ni.

League A group 1 inkhel dangah Bosnia and Herzegovina-in Haris Hajradinovic hmangin goal khung hmasa mah se Poland-in Kamil Glik leh Kamil Grosicki te goal hmangin an lehthal a, 2-1 in an chak.

Mancini-a'n Bosnia lakah point khat chauh an hlawhchhuah avangin player a thlak nual. Gianluigi Donnarumma, Leonardo Bonucci, Nicolo Barella leh Lorenzo Insigne te chauhin bul an ṭan nawn.

Netherlands pawhin Manchester United midfielder thar Donny van de Beek bul an ṭantir a, Matthijs de Ligt leh Stefan de Vrij te erawh inhliam vangin an khel thei lo.

Italy-in ball an chang tam a, ball an in pass tam zawk a, amaherawhchu goal a lut lawk lo. Mancini tan a naute khelh dan a lungawithlak a, chutihrualin inhliam vangin minute 42-naah Nicolo Zaniolo lakchhuah a ngai.

Injury time-ah Italy-in goal an khung ta nge nge a, Immobile cross chu box chhunga player te ber Barella-a'n a tauh lut. Kum 23 mi Barella hi 5ft 7in chauha sang ni a, a lu hmangin goal khung meuh lo mah se Netherlands lakah erawh goal awmchhun a khung.

Netherlands-in goal khungna hun ṭha an nei thei lo a, Italy substitute Moise Kean-a'n injury time-ah goal khung belhna hun ṭha a bawhpelh a, chak phu zawk an chak.

Netherlands coach Dwight Lodeweges chuan, "Team ṭha tak lakah kan chak lo. Kan tum a inang a, keini aiin an ti ṭha zawk. First half-ah thawkrim mah ila kan inthlawp ṭha lo. Ball kan chhuhsak khan player thlawptu an neih mai loh avangin an hloh leh ṭhin," tiin Italy an khel ṭha zawk tih a pawm.

Azzuri hian 57% ball possession an nei a, ball pass dik 528 an neih laiin Oranje-in vawi 339 chauh an in pass dik. Roberto Mancini chuan, "Netherlands hi an mualah khelh an harsa ṭhin a, chutichunga inkhel kan thunun theihna chhan chu ka naute an khelh ṭhat vang a ni. Tuna aia tam goal khung thei kan ni," tiin a sawi.

Italy hi an match hnuhnung 13 aṭangin vawi 12 an chak a, record an nei ṭha hle. Giorgio Chiellini chuan, "Netherlands ka hmachhawn hi khuanu ruat a ni. Kan khel ṭha a, tunah chuan group hmahruaitu kan ni leh ta. Kum hnih chhung chu ṭha takin kan khel tawh a ni," tiin a sawi. Chiellini hi Bosnia an hmachhawn ṭumin khel tur a ni a, Mancini-a'n a thai sual avangin Francesco Acerbi a lut 

ta zawk.