West Ham kha penalty pek loh tur - Webb

Manchester United leh West Ham inkhelh ṭumin hun tawp dawnah Hammers lamin penalty an hmu a, goal atana chantir zuiin Erik Ten Hag leh a naute 2-1 in an chak lo.

Referees chief Howard Webb chuan tun hnai khan he thil thleng hi sawi chhuakin, "Ka hmuh dan chuan VAR khan a tidik tawk lo, thil thleng kha ngun taka en chuan penalty pek turah ka ngai lo," tiin a sawi.

Man United defender Matthijs de Ligt-a'n West Ham striker Danny Ings lakah penalty a chawi - video assistant referee Michael Oliver chuan ennawnin penalty a pe. Referee David Coote pawhin khelmual sira monitor aṭangin a en a, an thutlukna an kaltlangpui.

Penalty hi Jarrod Bowen chuan a khung a, mualneitu West Ham 2-1 in an chak. Hammers an hneh loh aṭanga darkar 24 pawh a liam hmain Ten Hag chu ban zui a ni, a hma lama result a neih ṭhat loh tawhsa chu belhchhah niin, a hnain a tawrh phah.

Man United hian Ten Hag an ban tawh a, manager lailawk Ruud van Nistelrooy pawh a chhuak leh tawh, manager thar Ruben Amorim-a'n tun kar aṭangin hna a thawk ṭan a, kar tawpah match khelh tur an la neih loh avangin inbuatsaihna hun an nei dawn.

Amorim-a'n English club a kaihhruaina tur hmasa ber chu November 24, Pathianni zan niin Ipswich Town an lenchilh ang, chumi hnuah Europa League khel turin Bodo/Glimt an mikhual zui leh bawk ang.