Belgium tan Courtois a inlan dawn lo

Real Madrid goalkeeper Thibaut Courtois chuan ram tana inlan tumna a la nei rih lo a, an coach atana Domenico Tedesco rawih a nih chhung chu Belgium jersey haa inlan hi a tum tawh rih lo a ni.

Kum 32 mi Courtois hian ram tan match 102 ngawt a khel tawh a, mahse, August thla khan Tedesco hi an coach a nih chhung chu ram tana inlan tumna a neih tawh loh thu a puang.

Hemi hma hian Courtois hian Euro 2024-ah a inlan loh tur thu a puang tawh a, an coach nena an inkar boruak awm avangin ram tana inlan a châk lo.

Real keeper hi Euro khelh hma khan hliam vangin a buai reng a, mahse, season tawp lamah dam hmanin, Champions League nomawi an chawina final inkhelah pawh a inlan.

Heti chung hian Euro khel turin a feh chhuak duh lo a, telh a ni ta lo. August thlaa Tedesco-a'n an ram team a enkawl chhung chu Belgium jersey a hak tawh loh tur thu a sawi zui.

Hemi chungchangah hian kar hmasa lawk khan Belgian FA CEO Peter Willems chu Madrid khawpuiah zinin, Courtois hi inbiakna a neihpui a, mahse, Belgium hian an coach hi thlak mai tumna an nei rih lo a ni mai thei - ram tana inlan rih lo tura a thutlukna chu sut a tum lo.

Courtois leh Tedesco hi nikum Euro qualifier khelh lai khan an inhmu thiam lo a, Austria nen an inkhelh dawnin captain Kevin De Bruyne chu hliam vanga inhnukdawkin, Real keeper hian captain-a ruat a inbeisei.

Mahse, Tedesco-a'n Romelu Lukaku hnenah zawk captain armband a pe a, Atletico Madrid leh Chelsea tan pawha lo khel tawh keeper hi a lungawi lo zui ta a ni.

Courtois hian World Cup 2014, 2018 & 2022, Euro 2016 leh 2020 match zawng zawng kha a khel vek a, Euro 2024-ah erawh Belgian club Genk tana a khelhpui ṭhin Koen Casteels chuan a hmun ruak luahin si ban a nghak.

Season hmasaa hliam vanga inelna hrang hranga match nga chiah khel Courtois hi tun season-ah pawh hliam vangin a talbuai leh tawh a, Real match hnuhnung paliah khan a inlan lo - international break zawhah erawh a lo kir thei tura beisei a ni.