Sterling-a'n Liverpool chhuahsan a duh
Liverpool rawlthar duhawm Raheem Sterling chuan nipui transfer hunah Liverpool chhuahsan dil a tum. Kum 2017 thleng Anfield-a contract nei Sterling hian Liverpool-in kar khata £100,000 hlawh tura contract thar ziahpui an tumna chu a lo hnar tawh a ni.
Kum 20-a upa English winger hian Reds chief executive Ian Ayre leh manager Brendan Rodgers te chu Zirtawpni hian a titi pui dawn a, Liverpool chhuahsan a duh thu hrilh a tum niin khawthlang media te chuan an report. He thuthang chungchangah hian Liverpool lamin thuchhuah engmah an la nei lo a, Sterling hi chelh beh dan an ngaihtuah mek nia sawi a ni.
Tun season a che ṭha tak Raheem Sterling hian Europe club lian zingah duhtu a ngah hle a, amah duhtu langsar zingah Manchester City leh Arsenal te'n thawm an nei na hle. Liverpool lamin an winger hi chhuah tir tumna an neih loh thu tun hma in lo sawi tawh ṭhin mah se amah berin chhuah a dil a nih chuan pound maktaduai 35 chunglama hralh mai Liverpool hian an hnial lo nia sawi a awm bawk.
Sum aiah trophy
Raheem Sterling hian April thla khan manager Brendan Rodgers phalna la hmasa lovin BBC hnenah interview a lo nei tawh a, hemi ṭum hian Sterling chuan, "Ka rilruah sum in hmun a luah ber lo, eng car nge ka khalh anga, eng anga in ropui nge ka neih ang tih lamin min tibuai lo. Ka rilru luahtu ber zawk chu ka career tawp hunah trophy engzat nge ka chawi ang? tih zawk hi a ni," tiin kar khata £100,000 hlawha Anfield-a cham chhunzawm zel tura Liverpool-in an sawmna a hnar chhan a lo sawi tawh. Sterling hian kar khatah £35,000 a hlawh mek.
Kum 2012-a an trophy hnuhnung ber chawitu Liverpool hian season tharah Champions League an khel thei dawn lo a, Champions League khel lo tur team tan player ṭha hip khawm a har. Mahse, Liverpool manager Brendan Rodgers a phang lo. Irish manager chuan, "Liverpool hi khawvela club ropui leh ṭha ber pawl a ni a, kan club neitu te'n Sterling hi hralh ṭul lo an ti anih chuan hralh kher a ṭulna a awm lo. Raheem hian trophy chawi a duh a nih chuan he hmun hi a awmna tur dik tak a ni," tiin season thara trophy liantham chawi a tum hle.
Sterling tan Liverpool-a awm hi a ṭha a ni - Gerrard
Season thara USA pan mai tur Liverpool captain Steven Gerrard chuan Sterling chu Liverpool a cham rih turin a fuih a, amah ringtu coach kianga khelh chu a tan a ṭhat ber thu a sawi.
Liverpool captain chuan, "Ka ngaihdan chuan Sterling chher puitling tur hian Brendan Rodgers aia ṭha an awm lo. Player naupang zawk te'n an chhiat pui fo ṭhin chu an rilru a hmanhmawh a, engkim hi an duh ang diak diaka thleng tura an beisei nghal ṭhin hi a ni. An rilru hmanhmawh luatah club dang an pan thuai thuai a, player tikimtu satliah mai an ni leh si," tiin Sterling chuan Liverpool anga hmun pawimawh a chan theihna club a hmuh a rin loh thu a sawi.
Liverpool midfielder hlui Ray Houghton chuan, "Liverpool tana ṭha ber chu Sterling chhuah tir hi a ni. Supporter te'n theihtawp chhuaha chelh beh an duh a, chuti chung pawn engmah a hrethiam lo. Sterling hi amah duhtu club hnenah Liverpool hian hralh se la, amah aia class sang pound maktaduai 40-50 inkar man player he club zawm duh tur lalut mai rawh se," tiin club tana khelh chakna nei tawh lo kawl reng chu a ṭul loh thu a sawi.
Liverpool defender hlui Jamie Carragher chuan Raheem Sterling boruak vel chu a nin thu sawiin Sterling chu player ṭha tak a nih hran loh thu a sawi. Liverpool legend chuan, "Sterling hian engtikah emaw chuan hmun dang pan a duh dawn tih hi chiangsa a ni. He club a cham hi a duh tawh lo a, Liverpool-in an chhuah tir mai beisei vangin ualau takin he thu pawh hi a sawi a ni. Liverpool-in FA Cup semi-final a Aston Villa kan tum ṭum khan champion theihna hun ṭha kan nei a, chuti taka trophy chawi chak si chu kha inkhelah khan khawnge Sterling a awm? Trophy hi amahin a lo kal mai lo a, a hlawha hlawhchhuah a ngai a ni. Trophy dawng tur chuan game lian thamah i chet ṭhat a ngai a, chutiang chu Sterling hian a la ti lo," tiin Liverpool rawlthar khawsazia chu a dem hle.