Man Utd-a training tur Zahawma
Manchester United leh Youth Football International (YFI) te ṭangkawpin Apollo Tyres sponsor-in United-a kar khat chhung training tur player pakhat an thlang a, an thlan chhuah chu Mizo rawlthar Vanlalzahawma a ni.
Manchester United Soccer School (MUSS)-ah Apollo 'Go the Distance'scholarship programme neih a ni a, naupang 192 zetin an chhim. Heta ṭang hian naupang thiam bik paruk an thlang chhuak.
Naupang parukte hian kum khat chhung YFI, Delhi-ah football training a thlawnin an nei ang. Zawma bik hi Old Trafford-a kar khat training tura thlan a ni.
Vanlalzahawma hi Lalpianthara leh Lalrintluanga te fa pahnih zinga naupang zawk a ni a, Thingdawla cheng a ni. Amah hi kum 15 leka upa niin Shankar Vihar Public School, Delhi-ah pawl 11 a zir mek.
Manchester United hi Mizo naupang tan thil thar a ni tawh lo a, Manchester United Premier Cup-ah Mizo naupang paruk zet an inlan tawh.
Kum 2005 khan Mohun Bagan Sail Academy chu India Zone an paltlang hnuin, Southeast Asia-ah an champion zui a, Premier Cup khel turin an tling. Mohun Bagan-ah hian I League-a Aizawl FC tlin puitu David Lalrinmuana leh Lalrozama te bakah MPL2-a Luangmual FC captain B. Malsawmzuala te an kal.
Kum 2010 khan Shillong Lajong-in India Zone patlangin Premier Cup an khel leh a. Lajong-ah hian Mizo rawlthar Vanlalthlamuana, Zodingliana Tochhawng leh Jacob Lalrawngbawla te an khel.