De Bruyne hralh tum lo Allofs

Bundesliga-a pahnih­na ni mek Wolfsburg chief executive Klaus Allofs chuan an player chhuanvawr Kevin De Bruyne chu hralh tumna an neih loh thu sawiin 'hralh thiang lo' tiin a sawi.

Allofs chuan, "Tun dinhmuna De Bruyne ka hrilhfiah dan ṭha ber chu 'hralh thiang lo' tih hi a ni tawp mai. Nakumah kan hnenah bawk a khel leh dawn tih hi 100% in ka chiang a ni. Mahse, football-ah chuan thil beisei lo leh rin loh hi rang tak tak in a thleng phut ṭhin a ni," a ti.

Chelsea duhloh hnu De Bruyne hi tun season-ah Wolfsburg innghahna ber niin Bundesliga match 33 a khelhah goal 10 khungin a ṭhiante thun tur vawi 18 a siam sak tawh.

Belgian winger hi Europe club lian ho in an hmu tai hlawm hle a, hming langsar zingah Premier League club Manchester City pawh an tel. Media ṭhenkhat chuan Manchester khaw club hian pound maktaduai 40 thlenga insen pawh an huam niin an sawi.