Pellegrini-a'n Milner chelh theih a inbeisei

Manchester City manager Manuel Pellegrini chuan club official te chuan Etihad-a cham chhunzawm zel tura James Milner an hmin theih a beisei thu a sawi.

Season tawp ruala contract hmang zo mai tawh tur James Milner hian contract thar a la ziak rih lo a, amah duhtu langsar zingah Premier League club Liverpool an tel.

Chilean manager Pellegrini chuan, "Kan hnena cham turin James hi ka duh a ni. kan tan chuan player pawimawh tak a ni a, season tawp ruala contract thar a ziah dawn leh dawn loh chu ama duhtthlanna a innghat a ni. A hmalam hun tana ṭha tur chu a hre ngeiin ka ring tlat a ni. Kan tana player pawimawh a nihzia hi ka sawi fo ṭhin a, position hrang hranga khel thei, player fing tak a ni. Inkhelh apiangin 100% a pe ziah bawk," tiin a English player chu a fak hle.

Kum 29-a upa English midfielder hian August 2010 khan Aston Villa aṭangin Manchester City a zawm a, kum nga a cham chhungin Premier League title pahnih bakah FA Cup leh League Cup te a chawi tawh.