Lionel Messi a ṭha tual tual

Pathianni khan Barcelona-in Vicente Calderon-ah Atletico Madrid 1-0 in an hneh a, La Liga-ah an champion. Goal awm­chhun hi Lionel Messi khung a ni a, penalty area-ah Pedro nen wall pass an neih hnuin cool takin minute 65-naah a khung. Argentine forward danglamna chu defender venna hnuaia a chiai ve ngai lo hi a ni.

Barcelona hi treble champion thei dinhmunah an ding a, 2009 khan treble champion an lo ni tawh. Tun ṭuma kan zirchian tur chu 2009-a Messi nge ṭha zawk 2015-a Messi tih hi a ni.

Cristiano Ronaldo leh Messi khai­khin a ni ṭhin a, tun ṭumah chuan Messi leh Messi khaikhin a ni dawn. Ronaldo a nep tihna a ni lo, Portuguese forward hian Espanyol 4-1 an hneh ṭumin hattrick a siam a, La Liga-a a hattrick 26 na niin record a ni.

2009 Messi

Pep Guardiola enkawlna hnuaiah Barcelona-in Champions League, La Liga leh Copa del Rey ah ro an rel a, an champion vek. Khami ṭum khan Messi hian inelna hrang hrangah goal 38 a khung a, La Liga bikah goal 23 khungin assist vawi 11 a nei bawk.

Khatih hunlai khan Messi hian Samuel Eto'o leh Thierry Henry te nen Barca tlar hma an mawi a, Cameroon forward hian goal 36 a khung a, French forward-in goal 26 khungin an pathumin goal 100 an khung.

2015 Messi

Luis Enrique kaihhruaina hnuaiah Messi-a'n goal 54 a khung tawh a, match thum khelh tur a la nei bawk. Atletico lama chakna goal a khung kha league-a goal 41 a khung na a ni.

Season liamta khan Messi hian inelna hrang hrangah goal 41 a khung a, a chet chhiat ṭum niin sawi mah se 2009-a treble champion an nih ṭum aiin an khung tam zawk.

Messi hian tun season-ah assist 23 a nei tawh a, La Liga-ah 18 a neih bakah Champions League-ah panga a nei tawh. Mak ang reng tak chu nikum season khan Messi hian Europe-ah assist a nei miah lo a, La Liga-ah erawh vawi 11 a nei thung.

2009-a Barca tlar hma kha South America, Europe leh Africa-a forward ṭha ber ber te an ni a, 2015-ah chuan Barca tlar hma hi South American vek an ni. Messi, Suarez leh Neymar ten goal 113 an khung tawh.

Thutlukna chu

Messi hi kum 22 a nihin khawvela footballer langsar ber a ni tawh. A kum upat hnuah goal khung a chhunzawm zel a, statistics aṭanga thlirin tawnhriat a neih belh ang zelin record a nei ṭha tulh tulh. Kum 27 lekah a vanglai hun a hmang der tawh a, chutihrualin Messi hi a la ṭha dawn chauh a tih theih bawk.

Argentine forward hmalam hun erawh hunin a la hril ang a, football career tawp huna a record awm dan tur hi khawvel hriat châk chu a ni.