Napoli-in UCL an hnaih

Thawhṭanni zan Italy Serie A inkhelah Napoli chuan an mikual Cesena chu 3-2 a hnehin season thara Champions League khel turin an dinhmun an sawh nghet zel.

Season thara Serie B khel tawh tur Cesena hian theih tawp an chhuah a, inkhel bul pawh an ṭan ṭha. Forward Gregoire Defrel chuan minute 15 naah box pawn aṭangin Napoli goal dinglam kilah thlawh lutin Napoli a barakhaih.

Napoli-in Belgian winger Dries Mertens hmangin minute 19-ah an si phurh an sut nghal. Italian forward Manolo Gabbiadini chuan thun belhin Napoli-in 2-1 in hma an hruai. Casena tan Defrel chuan an si phurh hi sut ve leh mah se second half-ah Mertens bawkin an goal thumna a khung leh avangin 3-2 in Napoli an chak ta a ni.

Rafa Benitez-a naute hian Serie A match 36 khelh tawh aṭangin point 63 an hmu a, an chung chiaha awm pathumna Lazio nena an inthlauhna chu point thum chauh a ni. Table-a pathumna chin hian season tharah Champions League an khelh dawn avangin match hnih khelh hmabak an la neih hi a pawimawh hle ang.