UEFA-in financial fair play rule ti danglam dawn

Europe-a football thuneitu sang ber UEFA chuan kum 2011 aṭanga hman ṭan Financial Fair Play (FFP) chu nipui a UEFA executive committe-in a ngaihtuah ṭhat tur thu sawiin, club te sum hman dan khuahkhirhna chu tlema thlah dul deuh an tum thu an sawi.

UEFA president Michel Platini chuan, "Tun dinhmunah chian FFP hian thlawp a hlawh hle a, kan hlawhtlinpui rih viau a ni. Mahse, nipui a UEFA kan ṭhutkhawm hunah tun aia khirh lo zawka kalpui dan ngaihtuah kan tum a, ruahmanna ṭha tak tak tunah hian kan chhawpchhuak tawh a ni," a ti.

Financial Fair Play rule hnuaiah club tinte an sum lakluh aia tam an hman phalsak a ni lo a, hei hi Europe footballa sum che vel tam lutuk vanga club ṭhenkhat an tlakchhiat loh nana inven nan siam a ni. Nikum khan FFP bawhchhiat vangin Manchester City leh Paris St-Germain chu hrem an lo ni tawh.

UEFA general secretary Gianni Infantino chuan FFP rule siam ṭhat chungchangah Europe a club lian ho nen an inrawnkhawm mek thu sawiin, an dan chu engemawzat khawih danglam tum a nih thu a sawi ve bawk.

Infantino chuan, "Financial Fair Play rule kan hman mek hi a hlawhtling hle a, sum che velah pawh buaina a tlem phah. Kum 2011 a Europe club zawng zawng in sum an hloh zat euro tluklehdingawn 1.7 aṭangin kum 2014-ah chuan euro maktaduai 400-ah a tla thla tawh a, kan hlawhtling tih hei hian a nemnghet a ni," a ti.

Itlay lam chhuak Infantino chuan, "FFP thlak danglamna tura kan ruahman hian tun aia nasa zawkin sum hloh a ti tlem lehzual anga, sum leh pai hman dan khuahkhirh tho si a club te'n an duh ang player an lei theihna tur kan ruahman dawn a ni," a ti.

UEFA lam hruaitu te'n FFP hi hlawhtling viau angin sawi mah se a duhlotu an tam hle a, club lian sa ni lo, tunhnaia rawn lian thar te'n an duh anga sum an hman theih loh avangin an thlawp lo lehzual a ni.

FFP duhlotu langsar zingah Belgian lawyer Jean-Louis Dupont a tel a, kum 1995-a player transfer kalpui dan duh loh vanga FIFA leh UEFA lo khing hlawhtling tawhtu hian Brussels, Paris leh Switzerland court-ah te leh European Commission-ah UEFA hi FFP duhloh vangin a khing mek a, amah thlawptu langsar zingah Manchester City leh Paris Saint Germain an tel.

Tunhnaia UEFA thuthar chuan a tihlawm thu sawiin Dupont chuan, "Tunhnaia FFP thlak danglam tumna hian minti lawm hle a, rawtna kan neihsa mek te hian dan tharah hmun an chan ngei kan beisei bawk," tiin a sawi.

Hetihlai hian Europe-a club lian hrang hrang intelkhawm pawl European Club Association thupuangtu chuan FFP rule thar siam tur hian nikum December aṭang khan UEFA nen inbiakna an neih tawh thu a sawi a, thultukna hi June thla tawp lamah siam theih beisei a ni.