Cech hmalam hun hi ka kutah a awm lo - Mourinho

Chelsea manager Jose Mourinho chuan an goalkeeper Peter Cech chu Stamford Bridge-ah chelh chhunzawm zel duh mah se a hmalam hun chu a thuneihna piah lam a nih thu a sawi.

Premier League cham­pion Chelsea hian an veteran goalkeeper hi tun season-ah an chhawr tam lo hle a, Czech Re­public international aiah hian Belgian keeper Thibaut Courtois an chhawr rim tawh zawk. Cech duhtu langsar zingah Manchester United leh Arsenal te'n thawm an nei na hle.

Kum 2004 khan Cech hian Chelsea-a zawm a, match 332 zet a khel tawh. A club tan hian champion nomawi 15 zet a chawi tawh a, heng zingah hian Premier League title pali, Champions League, FA Cup, League Cup leh Eu­ropa te a chawi vek a ni.

Chelsea manager Mourinho chuan, "Ka ngaihdan chuan Cech hi khawvela goalkeeper ṭha ber te zinga mi a ni chiang. A kum a tam ve deuh tawh avangin inkhel zawng zawngah a inlan thei tawh lo pawh a ni thei e, mahse a theihna leh thiamnate kan thlir chuan chhuah tir mai atan chuan a uiawm hle a ni," a ti.

Chelh a duh thu sawi chhunzawmin Mou­rinho chuan, "Ka thu nise chuan Cech hian Chelsea a chhuahsan lo ang, a hnathawh tawh leh a thiltihte kan thir kir chuan mibik a ni tih kan hre vek. Chhuak loin kan hnena awm zel turin ka duh a, mahse a hmalam hunah hian ka thu a awm ve lo," tiin a sawi.