Gerrard tel lopawn kan khel thei tur a ni - Henderson

Liverpool midfielder Jordan Henderson chuan an captain Steven Gerrard-a'n season tharah LA Galaxy pan dawn mah se a tel lo pawha khel thei tura inbuatsaih turin a player pui te a fuih.

Kum 2011-a Sunderland aṭanga Liverpool zawmtu midfielder chuan, "Gerrard chhuak tur hi kan tan chuan channa nasa tak a ni dawn a, player ropui mai ni lo in mi ropui kan chan dawn a, a hmun ruak hnawhkhah hi a har dawn a ni. Mahse, team kan nih ang ngeiin Gerrard-a hmun ruak hnawhkhat tur hian ke kan pen a ngai a, mimal pakhatah kan innghat tur a ni lo," tiin team anga thawh ho a pawimawh thu a sawi.

Season thara Liverpool captain ni tura mi tak takin an beisei Hendo chuan, "A thiltih tawh leh hnathawh zawng zawng te thlir chuan Stevie hmunruak hi hnawhkhah theih loh a ni a, ani ang player ropui leh danglam bik hi chu an awm tawh lo ang tih hi thil chiang a ni. Mahse, player naupang leh ṭha tak tak, an thiamna phochhuah chak tak tak kan kawl ṭeuh a, anni nen hian season thar hi ṭha taka hman kan tum tur a ni," tiin Liverpool-ah player ṭha an tam thu a sawi.