CYMA FOOTBALL A zawna a vawi thum nan Armed Vengin final lut

Nimin tlai Lammual inkhel­ah William Lalnunfela hat-trick hmangin Armed Veng-in Dinthar 4-3 in an hneh a, CT Group Cup, CYMA Inter Branch Football Tournament 2015 final an lut. Armed Veng hian nizan inkhel hnuhnung zawka Bawngkawn leh Lengpui a chak zawk nen May 22-ah final an khel ang.

Football thiam veng tih a hriat lar ve ve inkhelah beisei ang ngeiin goal a lut hnem a, nimin tlai Lammual inkhel en tu ten an duh leh beisei ang inkhel hmuhnawm an hmu.

Inkhel ṭan aṭangin team pa­hnihin goal khung ngei an tum a nih tih a hriat a, an inveng tawn vak lo. Dinthar midfield laia ding Reuben Zosangpuia'n inkhel a khaikhawm viau a, minute 16-ah Lalsawmtluanga hmangin Dintharin an hmahruaina goal an khung.

Dinthar lam an lawm rei vak lo, an fan te an au phur vanglai takin minute 19 naah Armed Veng tan William Lalnunfela chuan an siphurh sutna goal a khung ve nghal. William a hmang vekin minute 28-ah Armed Vengin hma an hruai a, mahse first half tawp hmain Dinthar tan Lalrinkima chuan penalty aṭangin an siphurh a sut.

Second half-ah Armed Veng an chungnung zawk a, Vanlalduatsanga'n goal bar a tauh per bakah Mizoram Police Winger Lalfakzuala chuan goal ban a pet per bawk. Armed Vengin an hun ṭha an hloh nual hnuah William-a hmang vekin goal an khung leh. Dintharin an siphurh sutna hun ṭha an hmu, substitute aṭanga lo lut Samuel Laltlanthanga chuan box pawn aṭangin ṭha tak maiin a shot a, mah se a over hlauh.

Dinthar lamin an si phurh sut tumin nawr ngial mah se Armed Veng tlarhnunga Zoramthara leh Nghinglova te an nghing duh lo a, an su hawng zo lo. Goal dang a lut tawh dawn lo emawh tih laiin Dinthar defender Lalropuia'n amahni lamah a ti goal palh hlauh a, Armed Vengin 4-2 in hma an hruai. Dinthar tana Lalnumawia goal thunin awmzia a nei thu tawh lo hamrik hnuhung ber a ri zui nghal.

Armed Veng manager Lalramchhuana chuan, "Kan thawhrimna Pathianin mal min sawm vangin kan chak niin ka hria. Dinthar kha team ṭha tak an nih avangin inkhelh a harsa hle a, mahse kan tumruh rah kan seng a ni. Veng mipui an tam tawh a, anni min au phurna kha kan tan chuan chak pui tham a ni ve hrim hrim bawk," tiin a sawi.

Dinthar manager Lalthleng­liana chuan, "Kan vanduai leh khelh ṭhat tawk loh a innang hlauh a ni. Khawtlang mipui te leh YMA hruaitu ten min ṭawiawm ṭha em em a, an beisei ang kan thleng zo lo erawh a pawi ka ti. Second half a Lalnunsanga penalty chawi kha a awm lo hlein ka hria a, refree ṭha tak tak kan neih tawh rualin vawiin kha chuan kan match official te khan tihsual an nei nual a ni," tiin refree thutluknaah a lungawi loh thu a sawi.

Sawi chhunzawmin Thlenga chua, "Armed Veng kha team ṭha tak an nih avangin chak an phu a, final-ah pawh chak zui ngei se champion turin duhsakna ka hlan a ni," tiin a sawi.