Champion Chelsea an mualpho

The Hawthorns-ah West Bromwich Albion-in Premier League champion an hre lo. Thawhṭanni zan khan Saido Berahino goal hnih leh Chris Brunt te goal hmangin West Brom-in Chelsea 3-0 in an sawp a, Chelsea midfielder Cesc Fabregas hnawhchhuah a ni.

Chelsea leh West Brom te inkhel hi table aṭanga thlirin a pawimawh tawh lo a, Jose Mourinho hote an champion chiang tawh a, West Brom hi tla thei dinhmunah an ding tawh lo. Chutichung chuan inkhel erawh a tir aṭangin a nung hle.

Premier League match riat goal khung tawh lo Berahino-a'n minute 9-na lekah Joleon Lescott pass chu box sir aṭangin goal kilah a thun a, class tak a ni.

Chelsea game nung nghal phat mah se match 16 chhung hneh lo nei lo record humhim an tumna erawh Fabregas hnawhchhuah a nih avangin a harsa sawt a, buaina hi Chelsea forward Diego Costa leh Baggies centre-back Gareth McAuley te ṭan a ni. Referee Mike Jones-a'n ṭhelh a tum lai takin Spanish midfielder hian West Brom midfielder Brunt a pet per a, red card a hmu phah, a career-a ṭum hnih a hmuhna chiah a ni.

Chelsea-in tlem zawk nichungin first half tawp ṭha mah se second half ṭan chiahah Berahino-a'n Chelsea captain John Terry lakah penalty a hlawhchhuak a, English forward hian goal-ah a chantir nghal bawk.

Minute 60-naah Brunt-a'n West Brom goal thumna a khung a, chak tur a chiang ta. Chelsea-in Hawthorns an tlawh hnuhnung paliah chak an nei lo.

Terry a ropui

Chelsea captain Terry hian season kharnaa Sunderland an hmachhawn hunah minute 90 a khel tluan a nih chuan outfield player champion nomawi chawi thei season tluana khel vek thei pahnihna a ni ang.

1992-93 season khan Manchester United defender Gary Pallister chuan match zawng zawng a khel kim vek a, thlak a ni lo bawk.

Terry hi kum 34-a upa a ni tawh a, Chelsea player pawimawh a ni. Season chawhnu lam khan kum khat daih contract a ziah belh a, season tharah Chelsea tan a la inlan ang.

Mourinho a ngaihnawm

Chelsea manager Jose Mourinho chuan an chak loh chhanah team dang a dem a; Manchester City, Arsenal, Manchester United leh Liverpool te a sawina niin a lang.

Mourinho chuan, "Match thum khelh tur a la awmin kan champion tawh a, season tluana elpui tur kan neih lo hi kan chak lohna chhan pakhat chu a ni," tiin a player-te a sawisel duh lo.

Pulis thukhawchang

West Brom manager Tony Pulis chuan, "Match khat khelh tur kan la nei a, chutihrualin 13-naah hian kan lungawi tawk khawp mai. Old Trafford-ah Manchester United kan hneh a, Chelsea kan hneh a, Liverpool kan draw bawk. Match hnuhnung pangaa kan point hmuhna hi thlir ula, Premier League khelh zel hi kan phu a ni," tiin an record chu a chhuang hle.